ދިވެހިރާއްޖޭގެ 27 ވަނަ ނަޞްރުގެ ދުވަހުގެ މުނާސަބަތުގައި ދިވެހި ސިފައިން ބޭއްވި ޖަލްސާގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ދެއްކި ވާހަކަ : ކަޅުތުއްކަލާ ކޮށި، 3 ނޮވެންބަރު 2018
ޙަމްދާ ޝުކުރު ހުރީ ޝަހީދުންނަށް އެންމެ މަތިވެރި ނިޢުމަތްތައް ދެއްވާ ގަދަ ކީރިތިވަންތަ ﷲ ސުބުޙާނަހޫ ވަތަޢާލާއަށް. ޞަލަވާތާއި ސަލާމް ލެއްވުން އެދި ދުޢާ ދަންނަވަނީ މުސްލިމުންގެ ސިލްމާއި ސަލާމަތެއްކަމުގައިވި ކައު ސާހިބާ މުޙައްމދު ޞައްލަﷲ ޢަލައިހި ވަސައްލަމައަށް. މި ޞަލަވާތާއި ސަލާމުގައި އިތުރު އެކަލޭގެފާނުގެ މިތުރު އާލުންނާއި ޞަޙާބީން ޝާމިލު ކުރަން.
(އެޑްރެސް ކުރުން)
އައްސަލާމް ޢަލައިކުމް ވަރަޙުމަތުﷲ ވަބަރަކާތު.
އާދެ! މި އުފާވެރި ރަސްމިއްޔާތުގައި އަޅުގަނޑުގެ އެންމެ އިސް ވާޖިބެއްކަމުގައި ދެކެނީ މާތްވެގެންވާ އިސްލާމް ދީނާއި ޤައުމުގެ ސިޔާދަތާއި މިނިވަންކަމާއި އިސްތިޤުލާލު ދަމަހައްޓައި، ދިވެހި ދައުލަތުގެ ޝާނާއި ޝައުކަތު ހިފަހައްޓައި، ޤާނޫނީގޮތުން އުފެދިފައިވާ ސަރުކާރުގެ ދިފާޢުގައި ޖާނާއި މާލުން ޤުރުބާންވަމުންދާ ދިވެހި ސިފައިންނަށާއި ސިފައިންގެ ލޮބުވެތި ޢާއިލާތަކަށް، ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަދި ސިފައިންގެ އެންމެ މަތީވެރިޔާ، ޢަބުދުﷲ ޔާމީން ޢަބުދުލްޤައްޔޫމްގެ ނަންފުޅުގައި ނަޞްރުގެ ދުވަހުގެ ތަހުނިޔާއާއި ހެޔޮއެދުންތައް އަރިސް ކުރުން.
މިފުރުޞަތުގައި، ނޮވެމަބަރ 3 ގެ އުދުވާނީ ޙަމަލާގައި އަޅުގަނޑުމެންނާ ވަކިވެގެންދިޔަ އެންމެހާ ޝަހީދުންނަށް ސުވަރުގޭގެ ދާއިމީ ނިޢުމަތް މިންވަރު ކުރެއްވުންއެދި ދުޢާ ދަންނަވަން. ޝަހީދުންގެ ޢާއިލާތަކަށް ކެތްކެތެރިކަން ދެއްވައި، ހެޔޮ ގޮތްތައް މިންވަރު ކުރައްވާށި.
އާދެ! ނޮވެމަބަރ 3 ގެ އުދުވާނީ ޙަމަލާއަކީ ބޭރުގެ ޓެރަރިސްޓް ޖަމާއަތަކާ ގުޅިގެން، ޒާތީ ތައައްޞަބުން ފުރިގެންވާ މަދު ޚާއިނުންތަކެއް ދީފައިވާ ވަރަށް ނުރައްކާތެރި އުދުވާނީ ހަމަލާއެއް. އެ ހަމަލާއިން ދިވެހި ދައުލަތް ހިމާޔަތް ކުރުމަށްޓަކައި ދިވެހި ސިފައިން ވަނީ ވަރަށް މަތިވެރި ޖިހާދެއްކޮށްފައި. އަދި އެ ޢުދުވާނީ ހަމަލާގެ ދިފާޢުގައި ޙަރަކާތްތެރިވެވަޑައިގެންނެވި ޝަރަފުވެރި ސިފައިން، މިއަދުވެސް ސިފައިންގޭގެ އިސް މަޤާމުގަތަކުގައި ތިއްބެވުމުގެ ފައިދާ މިއަދުވެސް ކުރަމުންދާކަން އަޅުގަނޑު ފާހަގަ ކުރަން.
އަދި ނޮވެމަބަރ 3 ގެ ޢުދުވާނީ ހަމަލާއިން ރާއްޖެ ސަލާމަތް ކުރެއްވުމަށްޓަކައި އޭރުގެ ރައީސް، އަލްއުސްތާޛު މައުމޫން ޢަބަދުލްޤައްޔޫމް ބޭނުން ކުރެއްވި ޙިކުމަތު ޢަމަލީއާއި އެ މަކުފާނުގެ ޒަޢާމަތުގައި ބޭރުގެ ޤައުމުތަކުން ލިބިގެންދިޔަ އެހީތެރިކަމަކީ އަޅުގަނޑުމެންނަށް މިއަދުވެސް ދަރުސްތައް ލިބެމުންދާ ކަމެއް. އެކަމަށްޓަކައި، ރައީސް، އަލްއުސްތާޛު މައުމޫން ޢަބަދުލްޤައްޔޫމަށް ވަރަށް އިޚުލާޞްތެރިކަމާއެކު ޝުކުރު ދަންނަވަން.
އާދެ! މިއަހަރު ނަޞްރުގެ ދުވަސް އަޅުގަނޑުމެން މިފާހަގަކުރަނީ 3 ނޮވެމަބަރ އުދުވާނީ ޙަމަލާއަށްވުރެ ނުރައްކާތެރި ދިގުދެމިންގެންދާ ހަމަލާއެއްދީ، ޢިއްޒަތްތެރި ރައީސުލްޖުމްހޫރިއްޔާ އާއި އެމަނިކުފާނު ލޮބުވެތި ޢާއިލާ ޝަހީދުކޮށް، ޤައުމުގައި ލޭއޮހޮރުވައި، ޤާނޫނީގޮތުން އުފެދިފައިވާ ސަރުކާރު ބަދަލުކޮށްލުމަށް މަސައްކަތް ކުރަމުންދާ ވަރަށް ނުރައްކާތެރި ދަނޑިވަޅެއްގައި.
ނަމަވެސް، ﷲގެ ވާގިފުޅާއެކު ނޮވެމަބަރ 3 ގެ އުދުވާނީ ޙަމަލާގައި، ދިވެހިންނަށް ނަޞްރު ލިބުނުފަދައިން ފިނިފެންމާ ލޯންޗުކޮޅުގެ ހާދިސާގައިވެސް ދިވެހި ސަލާމަތީ ބާރުތަކުން މިހާރު މިވަނީ ކާމިޔާބުތަކެއް ހޯދާފައި. ޚާއިނުންތައް މިދަނީ ހޯދައި ހައްޔަރު ކުރަމުން. ހަތިޔާރުތައް މިދަނީ ހޯދަމުން.
މިޢުދުވާނުން ޤައުމު ރައްކާތެރި ކުރެއްވުމަށްޓަކައި ރައީސް ޢަބުދޫﷲ ޔާމީން ގެންގުޅުއްވާ ހަރުދަނާ ސިޔާސަތަށް އަޅުގަނޑު މަރުހަބާ ދަންނަވަން. އަދި އެމަނިކުފާނުގެ ނުގުޑާ، ވަރުގަދަ އަޒުމާއި ސާބިތުކަމަށްތަކައި އެމަނިކުފާނަށް ތަހުނިޔާ ދަންނަވަން.
ހަމައެހެންމެ، މިއުދުވާނީ ޙަމަލާއިން ޤައުމު ސަލާމަތުގެ އައްސޭރިއަކަށް ގެނެސްދެއްވުމަށް މޯލްޑިވްސް ޕޮލިސް އާ ގުޅިގެން މޯލްޑިވްސް ޑިފެންސް ފޯހުގެ ފަރާތުން ވަރަށް ފުރިހަމަ އޮޕަރޭޝަންތަކެއް ހިންގަވަމުން ގެންދަވާ ކަމަށްޓަކައި ޗީފް އޮފް ޑިފެންސް ފޯސް މޭޖަރ ޖެނެރަލް އަޙުމަދު ޝިޔާމަށާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙުމަދު ޝާހިދަށާއި އޮފިސަރުންނަށް ތަހުނިޔާ ދަންނަވަން.
ޚާއްޞަގޮތެއްގައި ދިވެހި ސިފައިންނަށް އަޅުގނަޑު އައްސަރިބަހާއި ސާބަސް ރައްދު ކުރަން. އަދި ސިފައިންގެ ޢާއިލާތަކުން ސިފައިންނަށް ދެއްވަމުންގެންދަވާ ތަރުޙީބަށްޓަކައި އެބޭފުޅުންނަށާއި މިމަސައްކަތުގައި ޢާންމު ރައްޔިތުންގެ ފަރާތުން ލިބެމުންދާ އެހީތެރިކަމާއި އެއްބާރުލެއްވުމަށް އަޅުގަނޑު ޝުކުރު ދަންނަވަން.
އާދެ! ޤައުމެއްގައި ދިރިއުޅެވޭނީ އެޤައުމެއްގައި މިނިވަންކަމާއި ސުލްޙަމަސަލަސްކަމާއި ހަމަޖެހުން ޤާއިމު ކުރެވިފައި އޮވެގެން. ދެމެހެއްޓެނިވި ތަރައްޤީއާ އިޤުތިޞާދީ ކުރިއެރުން ޤައުމަށް ހޯދައިދެވޭނީ އޭރުން. އުފާފާގަތިކަންމަތީ އެޤައުމެއްގެ މުވާތިނުންނަށް ދިރިއުޅެވޭނީ އޭރުން.
އެއާ ޚިލާފަށް، މާތްވެގެންވާ އިސްލާމް ދީނުގެ ޙުކުމްތަކާއި ދިވެހި އާދަކާދައާއި ދިވެހިންގެ އިޖުތިމާޢީ ފޭރާން ކުދިކުދިކޮށްލައި، އަމިއްލަ މަސްލަޙަތު އިސްކޮށް، ކާންދޭ އަތުގައި ދަތްއަޅައި، ޤައުމަށް ޣައްދާރުވާން ފަށައިފިނަމަ އެޤައުމެއްގެ މިނިވަންކަން ގެއްލި، އަޅުވެތިވެދާނެ.
މިއަދު ޤައުމުގައި ކުއްލި ނުރައްކަލުގެ ޙާލަތު އިޢުލާން ކުރަން މިޖެހުނީ ވެރިކަމުގެ ދަހިވެތިކަމުގައި މަދު ބަޔަކު ހިންގަމުންދާ ނާތަހުޒީމު ޢަމަލުތަކަކުން އެތައް ބައެއްގެ ފުރާނައަށް ނުރައްކާވާފަދަ ދަރަޖައަކަށް ކަންކަން ދިއުމުން. ކުއްލި ޙަލަތު އިޢުލާން ކުރީ ދިވެހި ދައުލަތާއި ރައްޔިތުންގެ ޙިމާޔަތުގައި.
ޤާނޫނާއި ޤަވާޢިދުތަކާ އެއްގޮތަށް ދިރިއުލެމުންދާ އެއްވެސް ފަރުދަކަށް ދަތިކަމެއް ނޯންނާނެ. އެހެންނަމަވެސް ޓެރަރިޒަމް ޙަރަކާތްތަކަށް ޤާނޫނުގައިވަގޮތުގެމަތިން ސަރުކާރުންނާއި ސަލާމަތީ ބާރުތަކުން ގެންގުޅޭނީ ޒީރޯ ޓޮލަރެންސް. ދިވެހި ސަލާމަތީ ބާރުތަކަށް ޤާނޫނުން ލާޒިމްކުރާ ކަންކަން ކުރާނެ. ބަލަންޖެހޭ ތަންތަން ވަގުތުން ބަލައި، ފާސްކުރަންޖެހޭ މީހުން ވަގުތުން ފާސް ކުރާނެ.
ރައީސުލްޖުމްހޫރިއްޔާއާއި ރިވެހިރައްޔިތުންނާއި މުޅި ދައުލަތުގެ ދިފާޢުގައި ދިވެހި ސިފައިންގެ ފުރާނަ ޤުރުބާންކޮށްލާކަށް ދިވެހި ސިފައިން ފަހަތަކަށް ނުޖެހޭނެ. މިޤައުމު ދިވެހި ސިފައިންނާއި ފުލުހުން ހިމާޔަތް ކުރާނެ.
އާދެ! މިޚުތޫރަތްތެރި ދަނޑިވަޅުގައި، މިޤައުމުގެ މުސްތަޤުބަލަށްޓަކައި، އަމިއްލަ މަސްލަހަތަށްވުރެ ޤައުމީ މަސްލަހަތު އިސްކުރައްވައި، ޓެރަރިޒަމްގެ އުދުވާނީ ޙަމަލާތަކުން ޤައުމު ހިމާޔަތް ކުރުމުގައި، އެންމެހައި ލޮބުވެތި ދިވެހި މުވާޠިނުން އަތާއަތު ގުޅާލައި، ޤައުމީ ދިފާޢީ ބާރުތަކަށް ފުރިހަމަ އެހީތެރިވެދެއްވުމަށް އިލްތިމާސް ކުރަން.
އަދި ކުއްލި ނުރައްކަލުގެ މި ޙާލަތުގައި މާތްވެގެންވާ އިސްލާމް ދީނާއި ޤައުމުގެ ސިޔާދަތާއި މިނިވަންކަމާއި އިސްތިޤުލާލު ދަމަހައްޓައި، ދިވެހި ދައުލަތުގެ ޝާނާއި ޝައުކަތު ހިފަހައްޓައި، ސިޔާސީ ނުފޫޒުން އެއްކިބާވެތިބެ، ޤާނޫނީގޮތުން އުފެދިފައިވާ ސަރުކާރު ދިފާޢުކޮށް، ދިވެހި ދައުލަތާއި ރައްޔިތުންގެ ދިފާޢުގައި، ސިފައިންގެ ޤާނޫނާއި ސިފައިންގެ ކޯޑް އޮފް ކޮންޑަކްޓްގައި ދެމި ތިއްބެވުމަށް ދިވެހި ސިފައިންނަށް އަޅުގަނޑު ނަޞޭޙަތްތެރިވަން.
އަޅުގަނޑުގެ އިޚުލާޞްތެރި ދުޢާއަކީ ދިވެހި ޤައުމަށް ނަޞްރާއި ފަތަހަ ދެއްވުން. ޢުދުވަނީ ޙަމަލާތަކުން ދިވެހި ދައުލަތް ސަލާމަތް ކުރެއްވުން. މިނިވަންކަންމަތީ އަބަދަށް މިޤައުމު ލެހެއްޓެވުން. އާމީން. ވައްސަލާމް ޢަލައިކުމް ވަރަޙުމަތުﷲ ވަބަރަކާތު.
3 ނޮވެންބަރ 2015