ސިފައިންގެ 124 ވަނަ އަހަރީ ޖަލްސާގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ދެއްކި ވާހަކަ : ކަޅުތުއްކަލާ ކޮށި، 2016
ގަދަކީރިތިވަންތަ ﷲ ސުބުޙާނަހޫ ވަތަޢާލާއަށް ޙަމްދާ ޝުކުރު ކުރަން. މި އުންމަތަށް ކައުކުރެއްވި ސާހިބާ މުޙައްމަދު ޞައްލަﷲ ޢަލައިހި ވަސައްލަމައަށް ޞަލަވާތާއި ސަލާމް ލެއްވުންއެދި ދުޢާ ކުރަން. މި ޞަލަވާތާއި ސަލާމުގައި އެކަލޭގެފާނުގެ އިތުރު އާލުންނާއި މިތުރު ސަޙާބީން ޝާމިލުކުރަން.
(އެޑްރެސް ކުރުން)
އައްސަލާމް ޢަލައިކުމް ވަރަޙުމަތުﷲ ވަބަރަކާތު.
އާދެ! ދިވެހި އަސްކަރީ ޚިދުމަތަށް 124 އަހަރު ފުރުމުގެ މުނާސަބަތުގައި ބާއްވާ މި ޚާއްޞަ ރަސްމިއްޔާތުގައި، އަޅުގަނޑުގެ އެންމެ އިސްވާޖިބެއްކަމުގައި ދެކެނީ ދިވެހިރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަދި ސިފައިންގެ އެންމެމަތީ ވެރިޔާ، ޢަބްދުﷲ ޔާމީން ޢަބްދުލްޤައްޔޫމްއަށާއި އެ މަނިކުފާނުގެ ލޮބުވެތި އަނބިކަނބަލުން، މެޑަމް ފާތުމަތު އިބުރާހީމްގެ އަރިއަހަށް ސިފައިންގެ ދުވަހުގެ ތަހުނިޔާއާއި ހެޔޮއެދުންތައް އަރިސްކުރުން.
އަދި ޗީފް އޮފް ޑިފެންސް ފޯސް މޭޖަރ ޖެނެރަލް އަޙުމަދު ޝިޔާމާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙުމަދު ޝާހިދާއި ޖެނެރަލް އޮފިސަރުންނާއި އޮފިސަރުންނާއި އެހެނިހެން ރޭންކުތަކުގައި މަސައްކަތްކުރައްވާ ހިތްވަރުގަދަ ސިފައިންނާއި ސިފައިންގެ ލޮބުވެތި ޢާއިލާތަކަށާއި ޝަރަފުވެރިކަމާއެކު ރިޓަޔަރކުރައްވާފައިވާ ސިފައިންނަށް އިޚްލާޞްތެރިކަމާއެކު ދުވަހުގެ ތަހުނިޔާ އަރިސްކުރުމަކީ އަޅުގަނޑަށް ލިބޭ ވަރަށް ބޮޑު އުފަލެއް.
މި ޚާއްޞަ ރަސްމިއްޔާތަށް ތިޔަ އެންމެހައި ޢިއްޒަތްތެރިން ވަޑައިގެންދެއްވުމަކީ ދިވެހި ސިފައިންގެ ޤައުމީ ޚިދުމަތުގެ އަގު ވަޒަން ކުރައްވާ މިންވަރު އަންގައިދޭކަމެއް. ވަކިން ޚާއްޞަގޮތެއްގައި ރައީސުލްޖުމްހޫރިއްޔާގެ ދެކަނބަލުން މިރަސްމިއްޔާތުގައި ބައިވެރިވެވަޑައިގެން ދެއްވުމަކީ ސިފައިންނަށާއި ސިފައިންގެ ޢާއިލާތަކަށް ލިބޭ ވަރަށް ބޮޑު ޝަރަފެއް. އަދި އެހާމެ ބޮޑު އުފަލެއް. އެކަމަށްޓަކައި ރައީސުލްޖުމްހޫރިއްޔާގެ ދެކަނބަލުންނަށް އަޅުގަނޑާއި އަދި އެންމެހާ ސިފައިންގެ ނަމުގައި ފަށްފަށުން ޝުކުރު ދަންނަވަން.
އަދި، އަޅުގަނޑުމެންގެ ދަޢުވަތު ޤަބޫލުކޮށް، މިރަސްމިއްޔާތަށް ވަޑައިގެންދެއްވިކަމަށްޓަކައި ތިޔަ އެންމެހާ ބޭފުޅުންނަށް ޝުކުރު ދަންނަވަން.
އާދެ! ސިފައިންގެ ޚިދުމަތުގެ 124 ވަނަ އަހަރީ ދުވަސް މިއަހަރުވެސް ރާއްޖޭގެ އެކިކަންކޮޅުތަކުގައި މިފާހަގަކުރަނީ ވަރަށް ކުލަގަދަގޮތެއްގައި. އަހަރީ ދުވަހާގުޅޭ އެންމެހާ ޙަރަކާތްތައް ރާއްވަވައި، ތައްޔާރު ކުރެއްވުމުގައި ބައިވެރިވެވަޑައިގަންނަވާ ބޭފުޅުންނަށް އައްސަރިބަހާއި ސާބަސް ރައްދު ކުރަން. އަދި މިރަސްމިއްޔާތުގައި ޚިދުމަތުގެ އަގު ވަޒަންކޮށް އިނާމާއި ހަނދާނީ ފިލާ ލިބިވަޑައިގަންނަވާ ފަރާތްކަށް އިސްކޮށް ތަހުނިޔާ ދަންނަވައި މުބާރިކުބާދީ އަރިސްކުރަން.
އާދެ! ދިވެހި ސިފައިންނާއެކު ޤައުމަށް ޚިދުމަތް ކުރުމަކީ އަޅުގަނޑަށް ލިބޭ ވަރަށްބޮޑު ޝަރަފެއް، އަދި މިއީ ވަރަށް ބޮޑު ޒިންމާއަކާއި އެހާމެބޮޑު މަސްއޫލިއްޔަތެއް. އަސްކަރިއްޔާގެ ހިންގުން އިތުރަށް ހަރުދަނާ ކުރުމަށް އަޅުގަނޑު މިދަނީ ބަދަލުތައް ގެންނަމުން. މިބަދަލުތައް ގެންނަމުން މިދަނީ ސިފައިންގެ ޤާނޫނުގައި ކަނޑައަޅާފައިވާ އަސްކަރިއްޔާގެ އެކިއެކި ގުނަވަންތަކުގެ އިޙުތިޞާސްތައް، މުސްތަޤިއްލުކަމާއެކު ފުރިހަމަށް އަދާކުރެވޭނެގޮތެއްގެމަތިން.
އަސްކަރިއްޔާގެ ހިންގުމުގެ އިސްތިރާޖީތައް ކަނޑައަޅުމުންމިދަނީ ސިފައިންގެ ވެލްފެއަރއަށް އިސްކަންދީގެން. ނަމަވެސް، ވަކިވަކި ފަރުދުންގެ މަސްލަހަތަށްވުރެ އަސްކަރިއްޔާ އިސްކޮށް، އަސްކަރިއްޔާއަށްވުރެ ޤައުމު އިސްކޮށްގެން. މި ބަދަލުތައް ގެނައުމުގައި ރައީސުލްޖުމްހޫރިއްޔާ، އަޅުގަނޑަށް ދެއްވާ ލަފާފުޅާއި އިރުޝާދާއި އަދި އަޅުގަނޑަށް ކުރައްވާ އިތުބާރަށްޓަކައި ރައީސުލްޖުމްހޫރިއްޔާއަށް އަޅުގަނޑު ހިތުގެ ފުންމިނުން ޝުކުރު ދަންނަވަން.
ދިވެހި އަސްކަރިއްޔާ ހިންގުމުގައި ޗީފް އޮފް ޑިފެންސް ފޯހާއި ލީޑަރޝިޕްގެ އެންމެހާ ބޭފުޅުންނާއި އޮފިސަރުންނާއި ކޮމާންޑަރުންނާއި ޚިދުމަތްތެރި ސިފައިން ދެއްވާ ފުރިހަމަ އެއްބާރު ލެއްވުމަކީ އަޅުގަނޑު ކުރަމުންދާ މަސައްކަތަށް ލިބޭ ވަރަށް ބޮޑު ހިތްވަރެއް. އަދި ރިޓަޔަރކުރައްވާފައި ތިއްބެވި އިސް އޮފިސަރުންގެ ފަރާތުންވެސް ފަންނީގޮތުން ވަރަށް ބޮޑު އެހީތެރިކަމެއް ލިބެމުންދޭ.
ދިވެހި އަސްކަރިއްޔާއަކީ ހަރުދަނާ އުޞޫލުތަކެއްގެމަތިން ހިނގަމުން އަންނަ މުއައްސަސާއެއް. ނަމަވެސް 2008 ވަނަ އަހަރުން ފެށިގެން ދިވެހި އަސްކަރިއްޔާ ހިންގަމުންދިޔަގޮތުން ގޮންޖެހުންތަކެއް ދިމާވެފައިވާކަން ފާހަގަ ކުރެވޭ.
ފިނިފެންމާ ލޯންޗުގައި ހިންގި ނުރައްކާތެރި ޙާދިޘާއަކީވެސް ނިޒާމުން ބޭރުން ހިންގި، ނަމަވެސް ދިވެހިއަސްކަރިއްޔާ އިސްޖަހާލަންޖެހުނު ޙާދިޘާއެއް. ދިވެހިއަސްކަރިއްޔާއަށް ވަރަށްގިނަ އިބުރަތްތެރި ފިލާވަލުތަކެއް ލިބުނު ޙާދިޘާއެއް.
އާދެ! ރައީސުލްޖުމްހޫރިއްޔާއާއި އެމަނިކުފާނުގެ ލޮބުވެތި އަނބިކަނބަލުން އަވަހާރަކޮށްލައި އަދި ޤާނޫނީގޮތުން އުފެދިފައިވާ ސަރުކާރު ވައްޓާލުމަށްޓަކައި ރޭވި ނުރައްކާތެރި ބަޣާވާތުން ޤައުމު ސަލާމަތްކޮށް، ސަރުކާރު ނަގަހައްޓައި، ޤައުމު ހަމަމަގަށް އެޅުއްވުމުގައި ރައީސުލްޖުމްހޫރިއްޔާ ބޭނުންކުރެއްވި ޙިކުމަތްޢަމަލީއާއި އެ ގެންގުޅުއްވި ހަރުދަނާ ސިޔާސަތުތަކާއި އެމަނިކުފާނުގެ ނުގުޑާ އަޒުމާއި ސާބިތުކަމާއި އަދި ކެތްތެރިކަމަކީ ހަމަހިމޭން ޖިހާދެއް.
ޤައުމު އަމާން ބަނދަރަކަށް ގެންދެވުމަށް އެ ވެވަޑައިގެންނެވީ ވަރަށް ބޮޑު ޤުރުބާނީއެއް. އެކަމަށްޓަކައި، އަޅުގަނޑާއި ދިވެހި ހުރިހާ ސިފައިން މަނިކުފާނަށް ކުރުނީސްކޮށް، އަދަބު ތަޢުޒީމު އަދާކުރަން.
މިފުރުޞަތުގައި ރައީސުލްޖުމްހޫރިއްޔާ ޤައުމު ތަރައްޤީ ކުރެއްވުމަށް ކުރައްވަމުންގެންދަވާ މިންނަތް މަސައްކަތްތަކާއި ދިވެހިރާއްޖެއަށް ގެންނަވަމުންގެންދަވާ އިންޤިލާބީ ބަދަލުތަކަށްޓަކައި މަނިކުފާނަށް އަޅުގަނޑު ތަހުނިޔާ ދަންނަވަން. މަނިކުފާނަށް ބާއްޖަވެރިކަމަށް އެދެން.
މިހިސާބުން އަސްކަރިއްޔާ އިތުރަށް ތަރައްޤީ ކުރުމަށް އަޅުގަނޑުމެން ކުރުމަށް ކުރަމުންދާ މަސައްކަތްތައް ޙިއްޞާކޮށްލާނަން.
އާދެ! ރާއްޖޭގެ އިޤުތިޞާދީ ސަރަހައްދު ބެލެހެއްޓުމަށް ބޭނުންވާ ވަޞީލަތްތައް އިތުރުކުރުމަށް ކުރަމުންދާ މަސައްކަތްތަކުގެތެރެއިން އިތުރު ހެލިކޮޕްޓަރެއް މި މަހު ލިބޭނެ. ރާއްޖޭގެ ސަރަހައްދުތައް ބެލެހެއްޓުމަށްޓަކައި ރާއްޖޭގެ އެކިކަންކޮޅުތަކުގައި ރާޑަރ ސިސްޓަމްތައް މިދަނީ ބަހައްޓަމުން. އަދި ރާއްޖޭގެ މަސްކަނޑުތައް ޙިމާޔަތްކުރުމަށް ބޭނުންކުރާނެ ހަތިޔާރުއެޅި އުޅަނދުތައް މިހާރު މިދަނީ ބަންނަމުން. ﷲގެ ވާގިފުޅާއެކު މިއަހަރުގެތެރޭގައި އެ އުޅަނދުތައް ލިބޭނެ. އަދި، އަސްކަރީ އަދާލަތު ޤާއިމު ކުރުމަށްޓަކައި އަސްކަރީ ކޯޓެއް ހެދުމުގެ މަސައްކަތް މިދަނީ ކުރަމުން.
އަސްކަރީ ތަމްރީނުތައް އިތުރުކޮށް، ހަރުދަނާކުރުމަށްޓަކައި އިއްޔެ ވަނީ ޑިފެންސް ކޮލެޖެއް އިފުތިތާޙުކޮށް އެ ކޮލެޖްގައި ރިސާރޗް އެންޑް ޑިވެލޮޕްމަންޓް ޑިޕާޓްމަންޓެއް ޤާއިމުކޮށްފައި. ކޮލެޖް އުފެދުމުން އޭރިޔާ ކޮމާންޑްތަކުގައި ނުވަތަ ކޯސްޓްގާޑް އުޅަނދުތަކުގައި ތިބެގެން ދުރުންދޭ ތަޢުލީމުގެ ނިޒާމުގެދަށުން ކިޔަވައި ގްރެޖުއޭޓްވުމުގެ ފުރުޞަތު އިތުރުވެގެންދާނެ. މީގެއިތުރުން، ހަނިމާދޫގައި އޭރިޔާ ކޮމާންޑެއް ޤާއިމު ކުރުމަށް މިދަނީ މަސައްކަތް ކުރަމުން. އާދެ! ޓެރަރިޒަމްގެ އުދުވާނީ ޙަމަލާތަކުން ޤައުމު ދިފާޢުކޮށް، ރައްޔިތުން ސަލާމަތްކުރުމަށްޓަކައި ނޭޝަނަލް ކައުންޓަރ ޓެރަރިޒަމް ސެންޓަރ ޤާއިމުވެ އެ ސެންޓަރގެ މަސައްކަތް މިހާރު މިވަނީ ފެށިފައި. އަދި ޤައުމީ ސަލާމަތާބެހޭ ބިލް އެކުލަވައިލެވި އެ ބިލް މިހާރު ވަނީ ދައުލަތުގެ ބަނޑާރަ ނައިބުގެ އޮފީހަށް ފޮނުވާފައި.
ދިވެހި އަސްކަރިއްޔާ ހަރުދަނާ ކުރުމަށްޓަކައި ކުރެވޭ ކަންކަމުގެތެރޭގައި ރިޓަޔަމަންޓް ޤަވާޢިދަށް ޢަމަލުކުރުން ހިމެނޭ. ރިޓަޔަމަންޓް ޤަވާޢިދަށް އަމަލުކުރަން ފެށުމުން ކުރިއަށްވުރެވެސް ސިފަވަންތަ ބަޔަކަށްވުމަށް އިތުރު މަސައްކަތް ސިފައިން ކުރަމުންދާކަން ފާހަގަ ކުރެވޭ.
ރިޓަޔަރކުރާ ސިފައިންނަށް ވަޒީފާ ލިބޭނެ. އެއީ، ސިފައިންނަށް ލިބުނު ވަރަށް ބޮޑު ހިތްވަރެއް. މިފުރުޞަތުގައި ރިޓަޔަރކުރާ ސިފައިންނަށް ވަޒީފާ ލިބޭނެ އިންތިޒާމް ހަމަޖެއްސެވިކަމަށްޓަކައި ސަރުކާރު ޙިއްޞާވާ ކުންފުނިތަކުގެ ވެރިންނަށް ޝުކުރު ދަންނަވަން.
ޤައުމު ދިފާޢު ކުރުމުގެ އިތުރުން ޤައުމު ބިނާ ކުރުމުގައިވެސް ސިފައިންގެ ދައުރު އަބަދުވެސް އޮވޭ. ރާއްޖޭގައި މިހާރުވެސް ހިނގަމުންދާ ބޮޑު ކޮންމެ މަޝްރޫޢެއްގައިވެސް ސިފައިން އެހީތެރިވޭ. މިހާރު އަޅުގަނޑުމެން މިވަނީ ޤައުމު ބިނާކުރުމުގައި ސިފައިންގެ ދައުރު އިތުރުކޮށްފައި. ސްކޫލް ދަރިވަރުންނާއި ޒުވާނުންނަކީ ޤައުމަށް ވަފާތެރި، ތަރުބަވީ، ހިންގުމުގެ ހުނަރު ލިބިފައިވާ ބަޔަކަށް ހެދުމަށްޓަކައި އޭރިޔާ ކޮމާންޑްތަކުން ގިނަގުނަ މަސައްކަތްތަކެއް ކުރައްވަމުން އެބަގެންދަވާ.
ރާއްޖޭގައި ހިނގަމުންދާ އަލިފާނުގެ ޙާދިޘާތަކުގެ ގެއްލުން ބޮޑުވާތީވެ، ފަޔަރ އެންޑް ރެސްކިއު އޮޕަރޭޝަންތަކަށް ބޭނުންވާ ވަސީލަތްތައް އިތުރުކޮށް، އަލިފާން ނިއްވުމަށް ފަސޭހަވާނެ ނިޒާމުތަކެއް ޤާއިމު ކުރަންޖެހޭ. މިހާރުވެސް މިދަނީ އަލިފާން ނިއްވުމާބެހޭ 3 މަރުކަޒެއް ރާއްޖޭގެ އެކި ހިސާބުތަކުގައި ޤާއިމު ކުރަމުން. އަލިފާން ނިއްވުމަށް މާލޭގައިވެސް ފަސޭހައިން ފެނާއި ލޮނު ޕްރެޝަރގައި ލިބޭނެ އިންތިޒާމް ހަމަޖެއްސުމުގެ މަސައްކަތް މާތް ﷲ ގެ ވާގިފުޅާއެކު މިއަހަރު ފަށާނަން.
ދިވެހިއަސްކަރިއްޔާ ތަރައްޤީ ކުރުމުގައި ރާއްޖެއާ ރަޙުމަތްތެރި ބޭރު ޤައުމުތަކުގެ އެހީތެރިކަން މިދަނީ ހޯދަމުން. އެގޮތުން ވަރަށް ގިނަ ޤައުމުތަކުގެ އެހީތެރިކަން އަސްކަރިއްޔާއަށް ލިބެމުންދޭ. އެހުރިހާ ޤައުމުތަކަށް ޝުކުރު ދަންނަވަން. ޚާއްޞަގޮތެއްގައި އިންޑިއާގެ އެހީތެރިކަން ފާހަގަކޮށްލަން.
ދިވެހި ސިފައިންނަކީ ޤައުމަށް ދިމާވާ ކޮންމެ ކަމަކަށް ކެރިގެން ކުރިމަތިލާ، ވަރަށް ޒިންމާދާރު ލަޝްކަރެއް. މާތްވެގެންވާ އިސްލާމް ދީނާއި ޤައުމުގެ ސިޔާދަތާއި މިނިވަންކަމާއި އިސްތިޤުލާލު ދަމަހައްޓައި، ދިވެހި ދައުލަތުގެ ޝާނާއި ޝައުކަތު ނަގަހައްޓައި، ޤާނޫނީގޮތުން އުފެދިފައިވާ ސަރުކާރުގެ ދިފާޢުގައި ޖާނާއި މާލުން ޤުރުބާންވަމުންދާ ބައެއް.
ދިވެހި އަސްކަރިއްޔާގެ ސަފުތައް މިއަދު މިއޮތީ ވަރަށް ބަދަހިކަންމަތީގައި. ޣައްދާރުންގެ ރޭވުމަކުން، ޚިޔާނާތްތެރިންގެ މަކަރުވެރިކަމަކުން މިލަޝްކަރުގެ ބަދަހި ސަފުތައް ފޫއަޅުވައެއް ނުލެވޭނެ. އަޅުގަނޑުގެ އިލްތިމާސަކީ ދިވެހި ސިފައިން ތިޔަގޮތުގައި ތިއްބެވުން. ދިވެހި އަސްކަރިއްޔާގެ މަސައްކަތްތަކަށް މާތްﷲ ތައުފީޤު ދެއްވާށި.
އާދެ! އަޅުގަނޑުގެ އިޚުލާޞްތެރި ދުޢާއަކީ ދިވެހި ޤައުމަށް ވިޔަވަތި ދުވަސްތަކެއް މިންވަރު ކުރެއްވުން. ދިވެހި އަސްކަރިއްޔާއަށް ރޯޝަނީ މުސްތަޤުބަލެއް ދެއްކެވުން. ކުރިއަށް ދިވެހި ސިފައިން، ކުރިއަށް ދިވެހި ޤައުމު. އާމީން. ވައްސަލާމް ޢަލައިކުމް ވަރަޙުމަތުﷲ ވަބަރަކާތު.
2016، ސާފުނުވޭ