ބްލޮގް

• ދިފާއީ

ފާސްޓް އިންޓަސެޕްޓް ވެސެލް ލޯންޗް ކޮމިޝަން ކުރުމުގެ ރަސްމިއްޔާތު

ފާސްޓް އިންޓަސެޕްޓް ވެސެލް ލޯންޗް ކޮމިޝަން ކުރުމުގެ ރަސްމިއްޔާތުގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ދެއްކި ވާހަކަ : ޖުމްހޫރީ މައިދާން، 2017

އެންމެހާ ޙަމްދާ ޘަނާ ޙައްގުވެގެންވަނީ އުޑުތަކާއި ބިންތަކާއި ކަނޑުތަކުގެ ވެރި މާތްﷲ ސުބުޙާނަހޫ ވަތަޢާލާއަށް. ޞަލަވާތާ ސަލާމްލެއްވުން އެދި ދުޢާކުރަނީ މާތް ﷲ ދެއްވި ނިޢުމަތްތަކުގެ ބޭނުން އެންމެ ހެޔޮގޮތުގައި ހިފާނޭގޮތުގެ ނަމޫނާ ދެއްކެވި މި އުއްމަތުގެ ސާހިބާ މުޙައްމަދު ރަސޫލުﷲ ޞައްލަﷲ ޢަލައިޙި ވަސައްލަމްއަށް. އަދި މި ޞަލަވާތުގައި އެކަލޭގެފާނުގެ އެންމެހާ އާލުންނާއި، އަޞްޙާބުން ޝާމިލްކުރަން.

(އެޑްރެސް ކުރުން)

އައްސަލާމް ޢަލައިކުމް ވަރަޙުމަތުﷲ ވަބަރަކާތު.

އާދެ "ބާރަށް ދުވާ ދިފާޢީ އަރުމާޒު" ޚިދުމަތަށް ނެރެވޭ މި ޚާއްޞަ ރަސްމިއްޔާތު ޝަރަފުވެރިކޮށްދެއްވުމަށް ސިފައިންގެ އެންމެ މަތީވެރިޔާ، ޢިއްޒަތްތެރި ރައީސުލްޖުމްހޫރިއްޔާގެ ދެކަނބަލުން ވަޑައިގެންދެއްވިކަމީ ސިފައިންގެ ލަޝްކަރަށް ލިބޭ ވަރަށް ބޮޑު އުފަލެއް. އެހާމެ ބޮޑު ޝަރަފެއް. އެކަމަށްޓަކައި ރައީސުލްޖުމްހޫރިއްޔާގެ ދެކަނބަލުންނަށް ދިވެހި އަސްކަރިއްޔާގެ ނަމުގައި ވަރަށް އިޚުލާޞްތެރިކަމާއެކު ޝުކުރު ދަންނަވަން.

އަދި މި ޚާއްޞަ ރަސްމިއްޔާތަށް ތިޔަ އެންމެހައި ޢިއްޒަތްތެރިން ވަޑައިގެންދެއްވުމަކީ ދިވެހި ސިފައިންގެ ޤައުމީ ޚިދުމަތުގެ އަގު ވަޒަން ކުރައްވާ މިންވަރު އަންގައިދޭކަމެއް.  އެކަމަށްޓަކައި ތިޔަ އެންމެހައި ބޭފުޅުންނަށްވެސް ޝުކުރު ދަންނަވަން.

ސިފައިންގެ ތާރީޚަށް ނަޒަރު ހިންގާލާއިރު ގާތްގަނޑަކަށް މީގެ 125 އަހަރު ކުރިންވެސް ރާއްޖޭގައި ދިފާޢީ ޚިދުމަތް ވަނީ ޤާޢިމުވެފައި. މި ވޭތުވެ ދިޔަ ދިގު މާޒީއަށް ބަލާއިރު، މުޅި ދިވެހި އަސްކރިއްޔާގެ ތާރީޚުގައިވެސް ވަޞީލަތުގެގޮތުން އެންމެ ބޮޑު ކުރިއެރުމެއް ލިބިފައިވަނީ މިއަދުގެ ރައީސުލްޖުމްހޫރިއްޔާ ޢަބްދުﷲ ޔާމީން އަބްދުލްޤައްޔޫމްގެ ޒަޢާމަތުގައި. ސިފައިންގެ ވެލްފެއަރގެ ކަންކަންވެސް އެންމެ ރަނގަޅު ކުރެވިފައިވަނީ ރައީސް ޔާއީމްގެ ޒަޢާމަތުގައި.

ސިފްކޯ ފްލެޓްތަކުގެ މަސައްކަތް އެދަނީ ބާރަށް ކުރިއަށް. ސިފައިންގެ އިންޖިނިއަރިންގ ވިދާޅުވާގޮތުންނަމަ، 2018 ވަނަ އަހަރުގެ އަހަރީ ދުވަހަށް ފްލެޓްތައް ނިމޭނެ. މިއަދު އަޅުގަނޑު އެސަރަހައްދަށް ދިޔައިރު 3 އިމާރާތުގެވެސް ފުރަތަމަ ފަންގިފިލާގެ މަސައްކަތް ނިމެނީ.

ރާއްޖޭގެ އެކި ސަރަހައްދުތަކުގައި ސިފައިންގެ ޢިމާރާތްތައް މިހާރު ދަނީ ޤާއިމު ކުރެވެމުން. މާލޭގައި 9 ބުރީގެ އިމާރާތް އެހެރަދަނީ ނިމެމުން، މާފިލާފުށީގައި، ޔުނިވަރސިޓީއެއްފަދަ ޓްރޭނިންގ ސެންޓަރެއް އެވަނީ ޤާއިމު ކުރެވިފައި.

ޚާއްޞަގޮތެއްގައި ދިވެހި ސިފައިންގެ ޤާނޫނީ ވާޖިބުތަކާއި މަސްއޫލިޔަތާއި ޒިންމާ އަދާކުރުމަށްޓަކައި، ސިފައިންގެ މުޅި ތާރީޚުގައިވެސް ހޯދުނު އެންމެ ޒަމާނީ ވަސީލަތެއް ކަމުގައިވާ "ބާރަށް ދުވާ ދިފާޢީ އަރުމާޒު" ޚިދުމަތަށް މިޔަދު ނެރެވޭކަމީ ޝައްކެއް ނެތްގޮތުގައި ދިވެހި އަސްކަރިއްޔާގެ ތާރީޚުގައި ރަން އަކުރުން ފަވާލެވޭނެ ކަމެއް. މިކަމަށްޓަކައި ދުވަހުގެ ތަހުނިޔާއާއި މުބާރިކްބާދު، ދިވެހި ސިފައިންގެ އެންމެމަތީވެރިޔާ އަދި ރައީސުލްޖުމްހޫރިއްޔާ ޢަބުދުﷲ ޔާމީން ޢަބުލްޤައްޔޫމަށް އަރިސް ކުރަން.

ހަމަ މިފުރުޞަތުގައި ވަރަށް ގިނަ ރޮނގުތައް ކުރެއްސެވުމަށްފަހު އަދި ވަރަށް ގިނަ އޮޅިތައް ގިރާ ކުރެއްވުމަށްފަހު "ބާރަށް ދުވާ ދިފާޢީ އަރުމާޒު" ޚިދުމަތަށް ނެރެވޭ މި އުފާވެރި މުނާސަބަތުގައި ޗީފް ޑިފެންސް ފޯސް އަދި ވައިސް ޗީފް އޮފް ޑިފެންސް ފޯސް އަށާއި ޖެނެރަލް އޮފިސަރުންނަށާއި ކޯސްޓްގާޑްގެ ކޮމާންޑަރަށާއި ހުރިހާ ސިފައިންނަށް ދުވަހުގެ ތަހުނިޔާ އަރިސް ކުރަން. މި އަރުމާޒު ވުޖޫދަށް މިއައީ ޗީފް ޑިފެންސް ފޯސްއާއި އަސްކަރިއްޔާގެ ލީޑަރޝިޕުން ކުރެއްވި މިންނަތް މަސައްކަތުން. މިކަމުގައި ޑިފެންސް މިނިސްޓްރީގެ ސްޓޭޓް މިނިސްޓަރާއި އިދާރީ މުވައްޒަފުން ކޮށްދެއްވި މަސައްކަތް އަޅުގަނޑު ފާހަގަ ކުރަން.

ރާއްޖޭގެ ކަނޑުގެ ސަރަޙައްދަކީ އަމާން ރައްކާތެރި ތަނެއްގެގޮތުގައި ދެމެހެއްޓުމަށްޓަކައި، މާދަމާއިން ފެށިގެން މިއަރުމާޒު ރާއްޖޭގެ ކަނޑުގެ އެކި ސަރަޙައްދުތަކުގައި ޙަރަކާތްރެރިވުމަށް ހަމަޖެހިފައިވާއިރު، އޭގެ 2 އުޅަނދު މިވަގުތުވެސް ވަނީ އޮޕަރޭޝަނެއްގައި ޙަރަކާތްތެރިވަމުން. ރާއްޖޭގެ މަސްކަނޑުތަކާއި، އިޤްތިޞާދީ ސަރަހައްދު ބެލެހެއްޓުމާއި ހާލުގައިޖެހޭ ފަރާތްތަކަށް އެހީތެރިވުމުގައިވެސް މި އުޅަނދުފަހަރުގެ ސަބަބުން ވަރަށް ބޮޑު ފަސޭހަތަކެއް ލިބިގެންދާނެ.

މި އުޅަނދުތައް ފަރުމާ ކުރެވިފައިވަނީ، ކުރިމަތިވެދާނެ ހަމާލާތަކުން ދިފާޢުކުރެވޭފަދަ، ވަޒަން ނާރާ ވަސީލަތްތައް ބޭނުންކޮށްގެން. ގަޑިއަކު ގާތްގަނޑަކަށް 50 މޭލު ބާރުމިނެއްގައި ދަތުރުކުރާ މި އުޅަނދުތަކަކީ ބެލެހެއްޓުމާއި، ގެންގުޅުމާއި ދުއްވުމުގެ ޚަރަދު ކުޑަ، ހަތިޔާރު ހަރުކުރެވިފައިވާ އަދި މިސައިލް ހަރުކުރުމުގެ ޤާބިލްކަން ލިބިގެންވާ ޒަމާނީ  އުޅަނދުތަކެއް.

މިވަސީލަތްތަކާއެކު ރާއްޖޭގެ އެތެރެވަރީގައި ހިނގާ މަދަނީ ކަންކަން އެހެން މުއައްސަސާތަކަށް ދޫކޮށްލުމަށްފަހު ދިވެހި ކަނޑުގެ ސިފައިން މިހާރު މިވަނީ ރާއްޖެމައްޗަށް، މާ ކަނޑަށް ނިކުމެ، ދިވެހި ކަނޑުގެ ސިފައިންގެ ހުރި ބުންވަރާއި ހަކަތަ ޤައުމީ ބޮޑެތި ކަންކަމުގައި ހިފަންޖެހޭ މިންވަރަށް ޤައުމު ތަރައްޤީވެފައި. މަދަނީ ކަންކަމުގައި ކަނޑުގެ ސިފައިން ތިބޭނީ ފުލުހުންނަށް ބޭނުންވާ މަދަދު ފޯރުކޮށްދޭ، ފާރަވެރިންގެގޮތުގައި. މިއަރުމާޒުން ފުލުހުންނަށްވެސް ބޭނުންވާ އެހީތެރިކަން ފޯރުކޮށްދެވޭނެ.

އާދެ! ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީ އާއި ދިވެހި ދައުލަތް ޙިމާޔަތްކޮށް ރައްކާތެރިކަމާއެކު ބެލެހެއްޓުމާއި ދިވެހިރާއްޖޭގެ މިނިވަންކަމާއި އިސްތިޤްލާލާއި ޤައުމުގެ ސިޔާދަތު ޙިމާޔަތްކޮށް ދިފާޢުކުރުމާއި ދިވެހިރާއްޖޭގެ ޤާނޫނީ ވެރިކަން ޙިމާޔަތްކުރުމުގައި ދިވެހި ސިފައިން އެންމެ އިންޗިއެއްވެސް ފަހަތަކަށް ނުޖެހޭނެ. ޤައުމަށް ދިމާވާ ކުއްލި ޙާލަތްތަކުގައި ޚިދްމަތް ފޯރުކޮށްދިނުމުގެގޮތުން ކުރަންޖެހޭ އެންމެހާ ކަންތައްކުރުމުގައި ހިތްވަރުގަދަ ދިވެހި ސިފައިން 7×24 ގައި ޚިދުމަތުގައި ތިބޭނެ. ދިވެހި ސިފައިން ހަފަރާތަށް ފާރަވެރިވާނެ.

މިޤައުމު ބިނާ ކުރުމާއި ޤައުމީ ތަރައްޤީގައި އެންމެ ބޮޑު ޤުރުބާނެއްވާބަޔަކީ އަބަދުވެސް ފަޚުރުވެރި ދިވެހި ސިފައިން. ދިވެހި ސިފައިން ޤައުމީ ޚިދުމަތުގެ ކަމަރު ބަނދެގެން ތިބީ ސިފައިންގެ ސުލޫކީ މިންގަނޑުގައިވާގޮތުގެމަތިން އަމިއްލަ ނަފުސަށްވުރެ ޤައުމު އިސްކޮށްގެން. ތިމާގެ މާއްދީ ފައިދާތަކަށްވުރެ މުޅި ޤައުމުގެ މަސްލަހަތާއި ތަރައްޤީއަށް އިސްކަންދީގެން.  

މިފުރުޞަތުގައި ދިވެހި އަސްކަރިއްޔާއަށް، ރައީސުލްޖުމްހޫރިއްޔާ ޢަބުދުﷲ ޔާމީންގެ ޒަޢާމަތުގައި އަންނަމުންދާ ހެޔޮ ބަދަލުތަކާއި ހޯއްދަވައިދެއްވަމުންގެންދަވާ ވަޞީލަތްތަކާއި އަސްކަރިއްޔާގެ ސިފަވަންތަކަން ދެމެހެއްޓުމަށް ދެއްވާ ލަފާފުޅާއި އިރުޝާދާއި ދިވެހި ސިފައިންނަށް ކުރައްވާ އިތުބާރާއި އިޙުތިރާމަށްޓަކައި އަދި ހަމައެހެންމެ މި މުއައްސަސާއަކީ ސިޔާސީ ނުފޫޒުން އެއްކިބާވެފައިވާ ފަންނީ މުއައްސަސާއެއްގެގޮތުގައި ކުރިއަށްގެންދިއުމަށް ދެއްވާ އަހައްމިއްޔަތަށްޓަކައި ވަރަށް އިޚުލާޞްތެރިކަމާއެކު ޝުކުރު ދަންނަވަން. އަދި 2003 ވަނަ އަހަރުން ފެށިގެން ރާއްޖޭގައި އުފެދިގެން އައި ކޯޅުންތަކުން ޤައުމު ސަލާމަތްކޮށް، ސުލްޙަވެރި، އަމާން ބަދަރަކަށް ޤައުމުގެ ނައު ވާސިލުކޮށްދެއްވިކަމަށްޓަކައި ރައީސުލްޖުމްހޫރިއްޔާއަށް އަޅުގަނޑު ތަހުނިޔާ ދަންނަވަން.

 

އަޅުގަނޑުގެ ވާހަކަކޮޅު ނިންމާލުމުގެ ކުރިން ދިވެހި ޤައުމަށްޓަކައި ދިވެހި ސިފައިން ކުރައްވަމުން ގެންދަވާ މަތިވެރި ޚިދުމަތާއި ވެވަޑައިގަންނަވާ ޤުރުބާނީއަށްޓަކައި، އަދި ދައްކަވަމުން ގެންދަވާ ކިޔަމަންތެރިކަމާއި ހަރުދަނާކަމަށްޓަކައި ހިތްވަރުގަދަ ސިފައިންނަށް އައްސަރިބަހާއި ސާބަސް ރައްދު ކުރަން. އެ ޚިދުމަތުގެ އަގު ވަޒަން ކުރަމުން، ދިވެހި އަސްކަރިއްޔާ ކުރިއަރުވައި ތަރައްޤީ ކުރުމުގައި، ދިވެހި ސިފައިންގެ ވެލްފެއަރގެ ކަންކަން ތަރައްޤީ ކުރުމުގައި، ސިފައިންގެ އެންމެ މަތީވެރިޔާގެ ލަފާފުޅާއި އިރުޝާދާއެކު ވަރުބަލިވުމެއްނެތި މަސައްކަތުގައި ދެމި ހުންނާނެކަމުގެ ޔަޤީންކަން ސިފައިންގެ އެންމެ މަތީވެރިޔާއަށާއި ޗީފް އޮފް ޑިފެންސް ފޯސް އަށާއި ދިވެހި ސިފައިންނަށް އަޅުގަނޑު އަރުވަން. ކުރިއަށް ދިވެހި ސިފައިން، ކުރިއަށް ދިވެހި ޤައުމު. ޝުކުރިއްޔާ! ވައްސަލާމް ޢަލައިކުމް ވަރަޙުމަތުﷲ ވަ ބަރަކާތުޙް.