ބްލޮގް

• ދިފާއީ

މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ދިވެހި އަސްކަރިއްޔާއާ ބައްދަލުކުރެއްވުން

މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ދިވެހި އަސްކަރިއްޔާއާ ބައްދަލުކުރެއްވުން : 11 އޮކްޓޫބަރު 2017

اَلحَمْـدُ لِلّـهِ رَبّ العَـالَمِـين‘ وَالصّـلاة وَالسّلام علـى محـمَّدٍ‘ وعلى آلـه وصحبـه أجمعـين.

(އެޑްރެސް ކުރުން)

އައްސަލާމް ޢަލައިކުމް ވަރަޙުމަތުﷲ ވަބަރަކާތު.

މިރޭ، ތިޔަ ލޮބުވެތި ސިފައިންނާ އަޅުގަނޑު މި ބައްދަލުކޮށްލީ މީގެކުރިން ވެސް ބޭއްވި މިފަދަ ބައްދަލުވުންތަކެކޭ އެއްފަދައިން ސިފައިންގެ ޚިދުމަތާގުޅޭ ބައެއް ވާހަކަތައް ހިއްސާކޮށްލައި، ސިފައިން އަދާކުރަމުންދާ ޤައުމީ މުހިންމު ޚިދުމަތާއި، ކުރައްވަމުން ގެންދަވާ ބުރަ މަސައްކަތްތަކާމެދު އަޅުގަނޑުގެ ހިތުގައި އުފެދޭ ޝުކުރުގެ ޝުޢޫރުތައް ހިއްސާ ކޮށްލުމަށް.

އާދެ! މިރޭ ތިޔަ ހިތްވަރުގަދަ ސިފައިންނާ ބައްދަލުކުރާއިރު، ޑިފެންސް މިނިސްޓްރީ ހިންގުމާ އަޅުގަނޑު ހަވާލުވިތާ ދެވަނަ އަހަރެއް މިދަނީ ފުރެމުން. އަޅުގަނޑު މި މަޤާމާ ޙަވާލުވި ދުވަސްވަރަކީ ރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަވަހާރަކޮށްލައި، ޤާނޫނީ ސަރުކާރު ވައްޓާލުމަށް މަސައްކަތް ކުރަމުންދިޔަ ދުވަސްވަރެއް. ސިޔާސީގޮތުން ވަރަށް ހަލަބޮލި، ޤައުމީ ސަލާމަތަށް ނުރައްކާވެފައިވާ، އަދި ދިވެހި އަސްކަރިއްޔާގެ ހިންގުން ވަރަށް ބޮޑަށް ގޯސްވެފައިވާ ދުވަސްވަރެއްގައި. އަސްކަރިއްޔާއަށް ސިޔާސީ ނުފޫޒުވަދެ އަސްކަރިއްޔާގެ ހިންގުމުގައި އިދާރީ މައްސަލަތައް ހުރި ދުވަސްވަރެއްގައި. ތަޢުލީމީ ދާއިރާގައި 35 އަހަރު ވަރަށް ޒާތީ މިނިވަންކަމާއެކު އުޅެމަށްފަހު ދިފާޢީ ދާއިރާއަށް ވަނީ އަޅުގަނޑުގެ ޚިދުމަތް މި ދާއިރާއަށް ބޭނުންވެއްޖެކަމަށް ރައީސުލްޖުމްހޫރިއްޔާ ޢަބުދުﷲ ޔާމީން ޢަބުދުލްޤައްޔޫމް ވިދާޅުވުމާއެކު، ރައީސް ކުރެއްވި އިތުބާރާއި ދެއްވި އިރުޝާދާއެކު ޤައުމަށް ޚިދުމަތް ކުރުމުގެ މަތިވެރި އަޒުމުގައި.

މިއަދު ދިވެހި އަސްކަރިއްޔާ ހިނގަމުން މިދަނީ ސިޔާސީ އެއްވެސް ނުފޫޒެއް ނެތި، ވަރަށް މުސްތަޤިއްލު ކަމާއެކު. ދިވެހި އަސްކަރިއްޔާ ހިނގަމުން މިދަނީ އަސްކަރިއްޔާގައި ކުރީއްސުރެ ތަރުތީބު ކުރެވިފައިވާ، ނިޒާމުތަކުގެތެރެއިން މިހާރަށް ގެންނަންޖެހޭ ބިނާކުރަނިވި، އިޞްލާޙީ ބަދަލުތަކާއެކުގައި. އަސްކަރިއްޔާގެ އޮޕަރޭޝަންތަކާއި ދުވަހުން ދުވަހަށް ހިންގާ ކަންކަން ބަލަހައްޓަވާނީ އަސްކަރިއްޔާގެ ޖަޑިބުން. ޗީފް އޮފް ޑިފެންސް ފޯސް އާއި ވައިސް ޗީފް އޮފް ޑިފެންސް ފޯސް. އަޅުގަނޑުގެ ޒިންމާއަކީ އަސްކަރިއްޔާ ފަސްމުގޫ ބެލެހެއްޓުމާއެކު ސިފައިންގެ ވެލްފެއަރގެ ކަންކަން ރަނގަޅު ކުރުމަށް މަސައްކަތް ކުރުމާއި އަސްކަރިއްޔާ ތަރައްޤީ ކުރުމަށް މަސައްކަތް ކުރުން.

ދިވެހި ސިފައިންނާއެކު ޤައުމަށް ޚިދުމަތް ކުރުމަކީ އަޅުގަނޑަށް ލިބޭ ވަރަށްބޮޑު ޝަރަފެއް، ވަރަށްބޮޑު ފަޚުރެއް. ދިވެހި އަސްކަރިއްޔާއާއެކުގައި އަޅުގަނޑު މަސައްކަތް ކުރަމުން މިދަނީ ވަރަށް ސާބިތުކަމާއެކު، ދިވެހި އަސްކަރިއްޔާ އިތުރަށް ހަރުދަނާ ކުރުމުގެ ވަރުގަދަ އަޒުމުގައި. މި މަސައްކަތުގައި ޗީފް އޮފް ޑިފެންސް ފޯސް މޭޖަރ ޖެނެރަލް އަޙުމަދު ޝިޔާމާއި ވައިސް ޗީފް އޮފް ޑިފެންސް ފޯސް ބްރިގޭޑިއަރ ޖެނެރަލް އަޙުމަދު ޝާހިދާއި ޖެނެރަލް އޮފިސަރުންނާއި ލީޑަރޝިޕުން ދެއްވާ ފުރިހަމަ އެއްބާރު ލެއްވުމަށް އަޅުގަނޑު ވަރަށް ބޮޑަށް ޝުކުރު ދަންނަވަން. ހަމައެހެންމެ، ތިޔަ ފަޚުރުވެރި ސިފައިން އަޅުގަނޑަށް ކުރައްވާ އިޙުތިރާމަށްޓަކައި ތިޔަ އެންމެހައި ބޭފުޅުންނަށްވެސް ޝުކުރު ދަންނަވަން.

އާދެ! މިދިޔަ ދުވަސްތަކުގައި ސިފައިންވަނީ ވަރަށް މުހިންމު ބޮޑެތި މަސައްކަތްތަކެއް ކުރައްވާފައި. އޭގެ ތެރެއިންވެސް ރަސްރަނި ބަގީޗާގެ މަސައްކަތް ޚާއްޞަގޮތެއްގައި އަޅުގަނޑު ފާހަގަކުރަން. ޗީފް އޮފް ޑިފެންސް ފޯސްގެ ސީދާ ބެއްލެވުމުގެ ދަށުން ސިފައިންގެ ވަރަށް ގިނަ ބޭފުޅުންގެ ބައިވެރިވުމާއި އެއްބާރުލެއްވުމާއެކު ކުރެވިގެންދިޔަ އެ މަސައްކަތަކީ ވަރަށް އަގުހުރި މުހިންމު ޤައުމީ މަސައްކަތެއް. އެ މަސައްކަތް އެހާ ފުރިހަމައަށް އެހާ ކުރު މުއްދަތެއްގެ ތެރޭގައި ސިފައިން ކޮށްނިންމަވާލެއްވި ފުރިހަމަކަމަށްޓަކައި އަޅުގަނޑު ތިޔަ ބޭފުޅުންނަށްޓަކައި ފަޚުރުވެރިވަން.

ތިޔަ ލޮބުވެތި ސިފައިން ތިޔަ ސާބިތުކޮށްދެއްވީ ކުރީގެ ޖީލުތަކުގެ ސިފައިންނެކޭ އެއްގޮތަށް ތިޔަ ބޭފުޅުންނަކީވެސް ޤައުމީ ބޮޑެތި ކަންކަމުގައި ދިވެހި ރައްޔިތުންނަށް ހުރި ހަރުދަނާ ނަމޫނާއެއްކަން. އެހެންކަމުން އަޅުގަނޑުގެ އިޚްލާޞްތެރި ޝުކުރު ޗީފް އޮފް ޑިފެންސް ފޯސް އަށާއި ވައިސް ޗީފް އޮފް ޑިފެންސް ފޯސް އަށް އަދި ތިޔަ ލޮބުވެތި އެންމެހާ ސިފައިންނަށް ދަންނަން.

އާދެ! ތިޔަ ބޭފުޅުންނަކީ ވަރަށް މަތިވެރި ޤައުމީ މަސްއޫލިއްޔަތަކާއި ވާޖިބެއް އަދާކުރުންމަތީ ދެމި ތިބި ބައެއް. ސިފައިންގެ ޤާނޫނުގައިވާގޮތުން ދިވެހި ސިފައިންނަކީ: (1) ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ދިވެހި ދައުލަތް ޙިމާޔަތްކޮށް ރައްކާތެރިކަމާއެކު ބެލެހެއްޓުމާއި (2) ރާއްޖޭގެ މިނިވަންކަމާއި އިސްތިޤްލާލް ދެމެހެއްޓުމާއި (3) ރާއްޖޭގެ ޤާނޫނީ ވެރިކަމަށް އުނިކަމެއް އަތުވެދާނެ ޤާނޫނާ ޚިލާފު ކޮންމެކަމަކުން ދިވެހިރާއްޖޭގެ ޤާނުނީ ވެރިކަން ޙިމާޔަތްކުރުމާއި (4) ދިވެހި ދައުލަތަށް ދިމާވާ ކުއްލި ޙާލަތްތަކުގައި އަވަސް އަދި ކުއްލި ޚިދްމަތް ފޯރުކޮށްދިނުމުގެ ޤާނޫނީ ވާޖިބު އަދާކުރުންމަތީ ދެމިތިބެންޖެހޭ ލަޝްކަރެއް.

މި ވާޖިބުތައް އަދާކުރުމަށްޓަކައި ސިފައިންގެ ޤާބިލުކަން އިތުރުކޮށް، ސިފަވަންތަކަން ދެމެހެއްޓުމަށް ކުރަންޖެހޭ ކަންތައްތައް އަބަދުވެސް ކުރިއަށް ގެންދަންޖެހޭ. ސިފައިންނަށް ބޭނުންވާ ތަމްރީނުތައް ތާވަލު ކުރެވިގެން ބަރާބަރަށް ކުރިއަށްދާންޖެހޭ. އަމިއްލަ ނަފްސު ތަރައްޤީކޮށް ކުރިއެރުވުމަށް އަބަދުވެސް އިސްކަން ދޭންޖެހޭ. ފަންނުވެރިކަމާއެކު ސިފައިންގެ ޚިދުމަތް ދެވޭނީ ސިފައިންނަށް ބޭނުންވާ ތަމްރީނުތައް ދީ، ޢިލްމާއި ހުނަރު ތާޒާ ކުރެވިގެން. ސިފައިންގެ ހަށިހެޔޮކަމާއި ދުޅަހެޔޮކަން ދެމެހެއްޓިގެން.

ސިފައިންނަކީ އެ ބޭފުޅެއްގެ ރޭންކުތަކުގެ ޒިންމާތަކާއި މަސްއޫލިއްޔަތު އެންމެ ފުރިހަމައަށް އަދާކުރުމަށް ވެސް ތަމްރީނުތަކެއް ހައްދަވަންޖެހޭ ބައެއް. މިގޮތުން ހައްދަވަންޖެހޭ ރޭންކު ތަމްރީނުތައް ފުރިހަމަކުރެއްވުމަށް ހުރިހާ ބޭފުޅުން ވެސް ސަމާލުކަން ދެއްވަންޖެހޭ. އަދި އަބަދުވެސް ހަށިހެޔޮކަމުގެ އަސާސީ މިންގަނޑުން ބޭރުނުވެ އެ މިންގަނޑުގައި ދެމިހުރުމަށް ފަރުދީގޮތުން ވެސް މަސައްކަތް ކުރައްވަންޖޭ. ހަމައެއާއެކު ބަޑިޖެހުމުގެ އަސާސީ މިންގަނޑުން ފާސްވުމަށް ބޭނުންވާ ތަމްރީނުގެ ފުރުޞަތުތައް ހުރިހާ ސިފައިންނަށް ވެސް ކޮމާންޑަރުން ފަހިކޮށްދެއްވަންޖެހޭ. މިކަންކަމުގެ ވާހަކަ އަޅުގަނޑު މި ފާހަގަކޮށްލީ މިކަންކަން މަޤާމުގެ ކުރިއެރުމާ އަދި ރިޓަޔަރމަންޓާ ވެސް ގުޅިފައިވާތީ. މަޤާމުގެ ކުރިއެރުން ލިބުމުގެ ހުރަހަކަށް މިކަންތައްތައް ވިޔަ ނުދިނުމަށް ބާރު އެޅުމުގެ ގޮތުން.

ދިވެހިއަސްކަރިއްޔާގެ ޚިދުމަތާއި ސިފައިންގެ މަސައްކަތުގެ އަޚުލާޤު އެއް ދުވަހުން އަނެއް ދުވަހަށް ރަނގަޅު ކުރުމަކީ ސިފައިންގެ ކޮންމެ މީހެއްގެ ވިސްނުމުގައި ގެންގުޅޭ ކަމަކަށް ވާންޖެހޭނެ. އަޅުގަނޑުމެންގެތެރެއަށް އަލަށް ތަޢާރަފުވާ ކަންކަމުގެ ސަބަބުން އަޅުގަނޑުމެންގެ މަސައްކަތުގެ އަޚުލާޤަށް ކުރަމުންދާ އަސަރުތަކާމެދު އަޅުގަނޑުމެން ފިކުރު ކުރަންޖެހޭ. ބޭރު އަސްކަރިއްޔާތަކުން ތަޖުރިބާ ކުރާ ކަންކަމާ، އަޅުގަނޑުމެންގެ ތަޖުރިބާތައް އަޅާކިޔަންޖެހޭ. ރާއްޖޭގައި ސިފައިން ޑިއުޓީ ކުރާ ވަގުތުތަކުގައި ސްމާޓް ފޯންގެ ފީޗަރސްތައް ބޭނުން ކުރުމަކީ ކޮންކަހަލަ އަސަރުތަކެއް މަސައްކަތުގެ އަޚުލާޤަށް ކުރާ ކަމެއްތޯ ވިސްނައިވަޑައިގަތުމަކީ މިރޭ އަޅުގަނޑު ތިޔަބޭފުޅުންގެ އަރިހުން އެދޭކަމެއް. އަދި ރާއްޖޭގެ މިއަދު ޙާލަތުގައި ސިފައިންގެ މަސައްކަތުގެ އަޚުލާޤަށާއި ސިފައިންގެ ޢާންމު ދިރިއުޅުމުގައި ސްމާޓް ފޯންގެ ފީޗަރސްތައް ބޭނުން ކުރުން އެންމެ ރަނގަޅު މިންގަނޑަކީ ކޮބައިތޯ ވިސްނައިވަޑައިގަތުމަކީ އަޅުގަނޑު އެދޭކަމެއް.   

ލޮބުވެތި ދިވެހި ސިފައިން!

ހަމަމިއާއެކު ޔުނިފޯމާއި ސިފައިން ނިދާ ފެންޑާތަކުގެ ހާލަތު ރަނގަޅުކުރުމަށްވެސް މިދަނީ މަސައްކަތްތަކެއް ކުރެވެމުން. ސިފައިންގެ ދިރިއުޅުމުގެ ހާލަތު އިތުރަށް ރަނގަޅުކޮށްދީ ގެދޮރުވެރި ކުރުމަށް މި ސަރުކާރުން ދަނީ ވަރަށް ބޮޑު އިސްކަމެއް ދީގެން މަސައްކަތް ކުރަމުން.

ފައިސާގެ މައްސަލަތަކެއްގައި ހުއްޓިފައިއޮތް ސިފްކޯ ފުލެޓުގެ މަސައްކަތަށް ބޭނުންވާ ފައިސާ ހޯދައި އެ މަސައްކަތް ވެސް ކަނޑައެޅިފައިވާ ތާވަލާއެއްގޮތަށް ކުރިއަށް އެބަދޭ. ސިފްކޯ ހިޔާގެ 330 ފުލެޓުގެ މަސައްކަތް ވަރަށް ގާތުން އަޅުގަނޑު މިގެންދަނީ ބަލަމުން. ދޭތެރެ ދޭތެރެއިން ސީދާ އެ ސައިޓަށް ޒިއާރަތްކޮށް މަސައްކަތް ހަލުވި ކަމާއެކު ކުރިއަށްގެންދިއުމުގައި ދިމާވާ ދަތިތައް ހައްލުކޮށްދިނުމަށް ޑިފެންސް މިނިސްޓްރީން ކުރެވެންހުރި ހުރިހާ މަސައްކަތެއް މިދަނީ ކުރަމުން. އަންނަ އަހަރު އެ ތަންތަނުގައި ސިފައިން ދިރިއުޅެވޭނެ. ސިފްކޯ ހިޔާއަށް އިތުރުކުރެވުނު 20 ފުލެޓް ދޫކުރެވޭ ފަރާތްތައްވެސް ހަމަޖެހޭ ރަނގަޅު އިންތިޒާމެއްގެ ތެރެއިން ވަރަށް އަވަހަށް އިޢުލާން ކުރެވިގެންދާނެ.

މިފަދަ ބޮޑެތި މަސައްކަތްތައް މިކުރެވެނީ ރާއްޖޭގެ ޢިއްޒަތްތެރި ރައީސުލްޖުމްހޫރިއްޔާ އަދި ސިފައިންގެ އެންމެމަތީވެރިޔާ ޢަބްދުﷲ ޔާމީން ޢަބްދުލްޤައްޔޫމް ސިފައިންގެ ކަންތައްތައް އެއްދުވަހުން އަނެއް ދުވަހަށް ރަނގަޅުކޮށް ފުރިހަމަކުރުމަށް ދެއްވާ އިރުޝާދާއެކުގައި. މި ފުރުސަތުގައި ހުރިހާ ސިފައިންގެ ނަމުގައި ޢިއްޒަތްތެރި ރައީސުލްޖުމްހޫރިއްޔާގެ އަރިއަހަށް ޝުކުރުގެ ތަހާނީ އަރިސްކުރަން.

މިރޭ އަޅުގަނޑު ތިޔަ ބޭފުޅުންނަށް އަރުވަން އޮތް އުފާވެރި ޚަބަރަކީ ސިފައިންގެ ހައުސިން އެލަވަންސް ލިބިވަޑައިގަންނަވާ ބޭފުޅުންގެތެރެއިން ހަށިހެޔޮކަމުގެ ތަމްރީނުން ފާސްނުވާ ބޭފުޅުންގެ ހައުސިންގ އެލަވަންސް ނުކަނޑުއްވާގޮތަށް ސިފައިންގެ އެންމެ މަތީ ވެރިޔާ ނިންމެވިކަމުގެ އުފާވެރި ޚަބަރު. ރައީސުލްޖުމްހޫރިއްޔާގެ އެ ނިންމެވުމާއެކު އަންނަ މަހުން ފެށިގެން ހަށިހެޔޮކަމުގެ އިމްތިޙާނުން ފާސްނުވާ ބޭފުޅުންގެ ހައުސިންގ އެލަވަންސް ނުކެނޑޭގޮތަށް އަޅުގަނޑުމެން ހަމަޖައްސާނަން.

ހަށިހެޔޮކަމުގެ ތަމްރީނުން ފާސްނުވާ ބޭފުޅުންގެ ހައުސިންގ އެލަވަންސް ނުކެނޑޭގޮތަށް ހަމަޖެއްސިނަމަވެސް، ހަށިހެޔޮކަމުގެ އިމްތިހާނުން ފާސްނުވުމުން އަޅަންޖެހޭ އެހެން ފިޔަވަޅުތައް އަޅަމުންދާނެ! ވީމާ، ހުރިހާ ބޭފުޅުންވެސް ހަށިހެޔޮކަމުގެ އިމްތިހާނުން ފާސްވެވަޑައިގަތުމަށް އިތުރު ސަމާލުކަން ދެއްވުން އެދެން.

ލޮބުވެތި ސިފައިން!

އެނނގިވަޑައިގަންނަވާނެފަދައިން، މާލޭގެ މަގުތައް ހަލަބޮލިކޮށް، ޓެރަރިޒަމުގެ ޢަމަލުތަކާއި މާރާމާރީ ހިންގައި އަދި އެއްވެސް ރަޙުމެއް ނެތި މީހުން މެރުންފަދަ ކަންކަން ޤައުމުގައި ހިނގުމަކީ އަޅުގަނޑު ވަރަށް ކަންބޮޑުވާ އަދި ވަރަށް ހިތާމަ ކުރާކަމެއް. ގޭންގ މާރާމާރިއަކީ އަސްކަރިއްޔާއާ ސީދާ ގުޅުމެއް ނެތް ކަމެއްކަމުގައި ވިޔަސް މާލެއަކީ އަމާން ތަނަކަށް ހެދުމަށްޓަކައި މޯލްޑިވްސް ޕޮލިސް ސަރވިސް އިން ކުރައްވަމުންގެންދަވާ މަސައްކަތުގައި ދިވެހި ސިފައިން ގުޅިގެން މަސައްކަތް ކޮށްދެއްވުމަށް މިހާރު ވާނީ ސިފައިންގެ ލީޑަރޝީޕްގައި ދަންނަވާފައި. ޒިންމާދާރުކަމާއެކު މި މަސްއޫލިއްޔަތު އަދާކޮށްދެއްވުމަށް އަޅުގަނޑު ދަންނަވަން.

ސަރުކާރުން ސިފައިންނަކަށް ޣައިރު ޤާނޫނީ އަމުރުކޮށް، ޤާނޫނުގެ އިމުން ބޭރުން ކަންތައްތައް ކުރުވާކަށް ނާންގާނަން. ޤާނޫނީ އިމުގެ ބޭރުން އެއްވެސް ކަމެއް ރައީސް ޔާމީންގެ ސަރުކާރުން ސިފައިން ލައްވާ ނުކުރުވާނެ ކަމުގެ ފުރިހަމަ ޔަޤީންކަން މިރޭ ވެސް އަޅުގަނޑު އަރުވަން.

އަންނަ އަހަރު ރާއްޖޭގައި ރިޔާސީ އިންތިޚާބު އޮންނާނެ. ސިޔާސީ ހަލަބޮލިކަން އިތުރުވާނެ. ރާއްޖޭގައި އެނބުރެމުންދާ ސިޔާސީ އޮއިވަރު މިހާރަށްވުރެ ވެސް ކުރިއަށް އޮތްތަނުގައި ބާރުވުމަކީ އެކަށީގެންވާކަމެއް. އެކަމަކު އެ އޮއިވަރުގައި ތިޔަ ލޮބުވެތި ސިފައިންގެ އެއްވެސް ބޭފުޅަކު ބެހިގެން ގޮސްގެންނުވާނެ. ތިޔަ ބޭފުޅުން މާތްﷲ ގަންދީ ކުރައްވާފައިވާ ހުވާ ހަނދާން ނައްތާލައިގެން ނުވާނެ. ޤާނޫނު އަސާސީންނާއި ޤާނޫނުން ސިފައިންނާ މަތިކޮށްފައިވާ މަސްއޫލިއްޔަތާއި ވާޖިބާއި ޒިންމާތަކަށް ފަސްޖެހިގެން ނުވާނެ. އެ އިތުބާރު ތިޔަ ބޭފުޅުން ދަމަހައްޓަވަންވާނެ.

ހިތްވަރުގަދަ ސިފައިން!

ތިޔައީ މި ޤައުމުގެ އައްޑަނަ. ޤައުމު ދިފާޢުކޮށް ޤާނޫނުއަސާސީ ނަގަހައްޓައި ޤާނޫނީގޮތުން އުފެދިފައިވާ ސަރުކާރު ދެމެހެއްޓުމުގެ ޒިންމާއާ ހަވާލުވެގެން ތިބި ހިތްވަރުގަދަ ދިވެހި ސިފައިން. ޤައުމީ ސަލާމަތަށް ކުރިމަތިވާ ކޮންމެ ގޮންޖެހުމަކާ ފިސާރި ކެރިގެން ކުރިމަތިލުމަށް ޢަޒުމު ކަނޑައަޅައިގެން ތިބި ހީވާގި މުވާތިނުން. ތިޔަ ބޭފުޅުންނަށްވުރެ މި ޤައުމު ދެކެ އިތުރަށް ލޯބިވާނެ ބަޔަކު ނުތިބޭނެ. ޙުއްބުލްވަޠަންގެ ރިވެތި ސިފަތަކުން ތިޔަ ބޭފުޅުންގެ ހިތްތައް ހުންނަންވާނީ ޖަރީ ކުރެވިފައި. ތިޔަ ބޭފުޅުންގެ އަޒުމު ވަރުގަދަ ވާންޖެހޭނެ. ވަފާތެރި، ލަފާދާރު، މައުސޫމު ދިވެހިންނަށްޓަކައި ތިބަ ބޭފުޅުންގެ ހިތްތައް މަޑުމޮޅިވާންޖެހޭނެ. އޯގާތެރިވާންޖެހޭނެ. ހަމްދަރީގެ އަތްތައް ދިގު ކުރައްވަންވާނެ. ޤައުމުގެ ދުޝްމަނުންނަށްޓަކައި ތިޔަ ބޭފުޅުންގެ ހިތްތައް ހިލައަށްވުރެ ހަރުވާންޖެހޭނެ. މާއްދީ ހުށަހެޅުމަކަށް ނުވަތަ ސިޔާސީ މަންފާއަކަށް ސިފައިންގެ ނަފުސާއި ޢިއްޒަތް ވިކިގެން ނުވާނެ. އެފަދަ ކޮންމެ ކަމަކަށް ނޫނެކޭ ބުނުމުގެ ހިތްވަރު ހުންނަންވާނެ.

 

އަޅުގަނޑުގެ ވާހަކަކޮޅު ނިންމާލާނީ، އަޅުގަނޑުމެންނަކީ ހެޔޮބަސް އަހާ، ހެޔޮ މަގުގައި ސާބިތުވެ ތިބޭ ބައެއްކަމުގައި ލެއްވުން އެދި ދުޢާކުރަމުން. ސިފައިންގެ ޤާނޫނީ ވާޖިބު އަދާކުރުމުގައި ސިފައިންނަށް މާތްﷲ ހެޔޮ ވިސްނުން ދެއްވައި ނަޞްރާއި  ނަސީބު މިންވަރު ކުރެއްވުންއެދި ދުޢާކުރަމުން. ސިފައިންނާއި ސިފައިންގެ ޢާއިލާތަކަށް އަދަށްވުރެ ފެހި މާދަމާއެއް މިންވަރު ކުރައްވާށި! ކުރިއަށް ދިވެހި ޤައުމު ކުރިއަށް ދިވެހި ސިފައިން. ވައްސަލާމް ޢަލައިކުމް ވަރަޙުމަތުﷲ ވަބަރަކާތު!