1438 ވަނަ އަހަރުގެ ރާއްޖެ އިސްލާމްވި ދުވަސް ފާހަގަ ކުރުން : 2017
އެންމެ ފުރިހަމަ ދީނަކީ އިސްލާމް ދީން ކަމުގައި ލެއްވި ގަދަކީރިތިވަންތަ اللّـه سبحـانـه وتعـالى އަށް ޙަމްދާ ޝުކުރު ކުރަން. އިސްލާމީ ރިސާލަތު ފެތުރުއްވެވި މާތް ނަބިއްޔާ محمد صلى الله عليه وسلم އަށްޞަލަވާތާއި ސަލާމު ލެއްވުންއެދި ދުޢާކުރަން. މި ޞަލަވާތާއި ސަލާމުގައި އެކަލޭގެފާނުގެ އިތުރު އާލުންނާއި މިތުރު ސަޙާބީން ޝާމިލު ކުރަން.
(އެޑްރެސް ކުރުން)
އައްސަލާމް ޢަލައިކުމް ވަރަޙުމަތުﷲ ވަބަރަކާތު.
އާދެ! ރާއްޖެ އިސްލާމްވީ ދުވަހުގެ ތަހުނިޔާއާއި ހެޔޮއެދުންތައް ރާއްޖޭގެ ޢިއްޒަތްތެރި ރައީސުލްޖުމްހޫރިއްޔާގެ ދެކަނބަލުންނާއި ތިޔަ އެންމެހާ ބޭފުޅުންނަށް އަރިސް ކުރުމަކީ އަޅުގަނޑަށް ލިބޭ ވަރަށް ބޮޑު އުފަލެއް.
ޝައްކެއް ނެތްގޮތުގައި ރާއްޖެ އިސްލާމްވި ދުވަހަކީ ދިވެހިރާއްޖެއަށް ވަރަށް ޚާއްޞަ ދުވަހެއް. ތާރީޚީ ދުވަހެއް. އެ ދުވަހަކީ ދިވެހިންނަށް އިސްލާމް ދީނުގެ ހިދާޔަތު ލިބުނު ދުވަސް. އެ ދުވަހަކީ ދިވެހިންނަށް ދެ ދުނިޔޭގެ ބާއްޖަވެރިކަން ލިބެނިވި މަގުގައި ފައިތިލަ ސާބިތު ކުރުމުގެ ނަޞީބު ލިބުނު ދުވަސް. އެ ދުވަހަކީ ޖާހިލުކަމާއި ޝިރުކުގެ ނުބައިކަމުން ދުރުހެލިވުމުގެ މަގު ދިވެހިންނަށް ކޮށިގެން ދިޔަ ދުވަސް. އެ ދުވަހަކީ ދިވެހިންނަށްވެސް، އިންސާނީ ޙައްޤުތަކެއްވާކަމައި އެޙައްޤުތަކާއެކު ޒިންމާތަކެއްވެސް ވާކަން ދަސްކޮށްދިނުމުގެ މަންޙަޖު ހުޅުވިގެންދިޔަ ދުވަސް.
އާދެ! ދިވެހިރާއްޖޭގެ މުޅި ތާރީޚުގައިވެސް ދިވެހިރާއްޖެއަށް އައި އެންމެ ބޮޑު އިންޤިލާބީ ބަދަލަކީ ރާއްޖެ އިސްލާމްވުމުން ޤައުމަށް އައި ބަދަލު. ރާއްޖެ އިސްލާމް ވުމުން ދިވެހިންނަށް އައި ބަދަލު. ދިވެހިންގެ ޢަޤީދާއަށް އައި ބަދަލު. ދިވެހިންގެ އަޚުލާޤަށް އައި ބަދަލު. އަދި ދިވެހިންގެ ސަޤާފަތަށް އައި ބަދަލު.
ރާއްޖެ އިސްލާމް ވުމަކީ ދިވެހިންނަށް ލިބުނު އެންމެ ބޮޑު ނަޞްރު އަދި ދިވެހިންނަށް ލިބުނު އެންމެ ބޮޑު ނަޞީބު. ރާއްޖެ މިއަދު ދެކެމުން މިދާ ތަހުޒީބާއި ތަމައްދުންގެ ސިއްރަކީ އިސްލާމް ދީން. އިސްލާމް ދީނަކީ ތަހުޒީބާއި ތަމައްދުންގެ ދީން. އެއްބައިވަންތަކަމުގެ ދީން. ބައިބައިވުމަކަށް އިސްލާމް ދީން ހުއްދައެއް ނުކުރޭ.
ރާއްޖޭގެ ތާރީޚަށް ނަޒަރު ހިންގާލާއިރު، ރާއްޖެ އިސްލާމްވުމުގެ ކުރިން ރާއްޖޭގައި ތަފާތު ދީންތަކަށް މީހުން އުޅުނުކަން ސާބިތުވޭ. އިންޑޯ-އާރިޔަނުންނާއި މަޣުރިބު ކަރައާއި ޢަރަބި ޤައުމުތަކުގެ ސައްޔާޙުން ރާއްޖެއަށް ދަތުރުފަތުރުކޮށް، ދިރިއުޅެފައިވާކަމާއި އެކިޤައުމުތަކުން ދުނިޔޭގެ އެކި ބައްރުތަކަށް ދަތުރުފަތުރު ކުރުމުގައި ރާއްޖޭގެ ކަނޑުއޮޅިތައް ހުރަސްކޮށްފައިވާކަން ސާބިތުވޭ. މީލާދީގޮތުން މީގެ 864 އަހަރު ކުރިން 1153 ވަނަ އަހަރު، ރާއްޖެ އިސްލާމް ވީ މިދެންނެވިގޮތުގެ މަތިން ރާއްޖެއަށް ޒިޔާރަތް ކުރެއްވި ބޭފުޅެއްގެ އަތްމައްޗަށްކަން ތާރީޚުގެ ފަތްފުއްތަކުން ފެންނަން އެބަހުރި.
ރާއްޖޭގައި އެކި ދުވަސްވަރު ވެރިކަން ކުރެއްވި އެކި ރަސްރަސްކަލުން އިސްލާމް ދީނަށް އިސްކަންދެއްވި މިންވަރު ތަފާތު. ބޮޑުތަކުރުފާނު ޕޯޗްގީޒުންގެ އަތްދަށުން ރާއްޖެ މިނިވަން ކުރެއްވުމަށްފަހު ރާއްޖޭގައި އިސްލާމް ދީނުގެ ހިދާޔަތު ފެތުރުއްވުމާއި ދެމެހެއްޓެވުމަށް ގިނަގުނަ މަސައްކަތްތަކެއް ކުރެއްވި. ނަމަވެސް 9 ވަނަ ޙަސަން ރަސްގެފާނު ރާއްޖޭގެ ވެރިކަމުގެ ދަހިވެތިކަމުގައި ދީން ވިއްކާލެއްވި. މިއީ ރާއްޖޭގެ ތާރީޚު ހެކިދޭ ޙަޤީޤަތެއް. މިކަން މިހެން އޮތްކަމުގައިވިޔަސް ދިވެހިންނަކީ އިސްލާމް ދީނުގެ ހިދާޔަތުގެ އަލިކަން ލިބުނު ދުވަހުން ފެށިގެން އިސްލާމް ދީނަށް ލޯބިކުރާ ބައެއް. ދީނީ ޢިލްމުވެރިންނަށް ވަކިން ބޮޑަށް އިޙުތިރާމްކުރާ ބައެއް.
އިސްލާމް ދީނަށްޓަކައި، ރާއްޖޭގައި ވެރިކަން ކުރެއްވި ގިނަ ބޭފުޅުންނާއި ގިނަ ސަރުކާރުތަކުން އަދި އަމިއްލަ ފަރުދުންވެސް އިސްލާމް ދީނަށްޓަކައި އަދި ދީނީ އެއްބައިވަންތަކަން ޙިމާޔަތް ކުރުމަށް ގިނަގުނަ މަސައްކަތްތަކެއް ކުރައްވާފައިވޭ. ދުސްތޫރީ ނިޒާމުގެތެރެއިން ވެސް ރާއްޖޭގައި އިސްލާމީ ވަހުދަތު ދެމެހެއްޓުމަށް ގިނަގުނަ މަސައްކަތްތަކެއް ދަނީ ކުރަމުން.
ރާއްޖޭގެ ޤާނޫނު އަސާސީގެ 10 ވަނަ މާއްދާގެ (ހ) ގައި ބުނާގޮތުން ދިވެހި ދައުލަތުގެ ދީނަކީ އިސްލާމް ދީން. އަދި ދިވެހި ރައްޔިތުންގެ ދީނީ އެއްބައިވަންތަކަން ޙިމާޔަތް ކުރުމުގެ ޤާނޫނުގެ (ޤާނޫނު ނަންބަރު 94/6) ގެ 1 ވަނަ މާއްދާގައި ބުނާގޮތުން ދިވެހިންގެ މެދުގައި ދީނީ އެއްބައިވަންތަކަން ދެމެހެއްޓުމަކީ ރާއްޖޭގެ މިނިވަންކަމާއި ސިޔާދަތު ރައްކާތެރިކޮށް، ރާއްޖޭގެ އަމަންއަމާންކަމާއި ސުލްޙަމަސްލަޙަތު ދެމެހެއްޓުމަށްޓަކައި ކޮންމެހެން ބޭނުންވާ ކަމެއް. އެހެންކަމާއެކު މާތްވެގެންވާ އިސްލާމް ދީނާއި ރާއްޖޭގެ މިނިވަންކަމާ ވަނީ ގުޅިލާމެހިފައި.
ދިވެހިރައްޔިތުންގެ ދީނީ އެއްބައިވަންތަކަން ޙިމާޔަތް ކުރުމުގެ ޤާނޫނު ވަނީ 1994 ވަނަ އަހަރު ތަޞްދީޤުކޮށްފައި. އަދި މިޤާނޫނަށް 2014 އަދި 2016 ވަނަ އަހަރު ބޮޑެތި ބަދަލުތަކެއް ގެންނަވާފައިވޭ. 2014 ވަނަ އަހަރު ގެނެވުނު ބަދަލުގެތެރޭގައި ސްކޫލްތަކުގައި ކިޔަވައިދޭ އިސްލާމީ ތަރުބިއްޔަތު ގްރޭޑް 1 ން 12 އާ ހަމައަށް ކިޔަވައިދިނުން ޤާނޫނަކުން ލާޒިމުކުރި. މިއީ ރާއްޖޭގެ މަދަރުސީ ތަޢުލީމުގެ ޤައުމީ މަންހަޖު ލާދީނީ ކުރުމުގެ ފިކުރެއް ރާއްޖޭގައި ފެތުރުނަ ނުދިނުމަށް ރައީސް ޔާމީންގެ ސަރުކާރުން އެޅުއްވި ޙިކުމަތްތެރި ފިޔަވަޅެއް. މިދެންނެވި ބަދަލުގެ އިތުރުން 2016 ވަނަ އަހަރު ގެނެވުނު ބަދަލުގެތެރޭގައި "އިސްލާމީ ފަތުވާދޭ އެންމެ މަތީ މަޖިލިސް" އުފެއްދެވި.
އަޅުގަނޑު މިދެންނެވި ޤާނޫނުތަކުގެ މަފުހޫމަށް ބަލާއިރު ރާއްޖޭގައި އިސްލާމް ދީނުގެ ވަހުދަތު ދަމަހައްޓާނެ، އިސްލާމް ދީނަށް ލޯބިކުރާ، އިސްލާމް ދީނުގެ ތަރަހައިގެތެރޭގައި ވެރިކަން ކުރާނެ ވަލިއްޔުލްއަމުރެއް އިޚުތިޔާރު ކުރުމަކީ ދިވެހި ކޮންމެ މުކައްލަފަކު، ކޮންމެ މުވާތިނަކު ކޮންމެހެން ކުރަންޖެހޭނެކަމެއް.
އާދެ! ދިވެހިރާއްޖެއަކީ ސައްތަ އިން ސައްތަ މުސްލިމު ޤައުމަކަށް ވާތީ ކަންބޮޑުވާ ބަޔަކު އަބަދުވެސް އުޅޭކަން އަޅުގަނޑުމެން ދަންނަންޖެހޭނެ. އަދި އެފަދަ ފަރާތްތަކާ ގުޅިގެން މަސައްކަތްކުރާ މީހުންނާމެދު އަޅުގަނޑުމެން ހުޝިޔާރުވެ ތިބެންޖެހޭނެ. އެފަދަ ފަރާތްތަކާމެދު އަޅުގަނޑުމެން ޣާފިލުވެގެން ނުވާނެ.
ބޭރު ޤައުމަކުން ރާއްޖެއަށް ނުފޫޒު ފޯރުވަން ބޭނުންވާ މައިގަނޑު އެއް ސަބަބަބީ އިސްލާމް ދީން ނޫން ދީންތައް ރާއްޖޭގައި ތަޢާރަފު ކުރުމަށް ފުރުޞަތު ހޯދުން. އިސްލާމީ އުޞޫލުތަކާ ފުށައަރާ، ރާއްޖޭގެ އާދަކާދައާއި ސަޤާފަތާ ބީރައްޓެހި މަފުހޫމްތައް ރާއްޖެއަށް ފެއްތޭތޯ ބެލުން. މިއީ ފިކުރީ ހަނގުރާމައިގެ ސްޓްރެޓަޖީއެއް.
ދިވެހިރާއްޖެއަށް ގެންނަންޖެހޭނީ އިސްލާމް ދީނުގެ ތަރަހައިގެ ތެރޭގައި ގެނެވޭ ތަހުޒީބާއި ތަމައްދުން. އިސްލާމީ އުޞޫލުތަކާ ފުށައަރާ ޑިމޮކްރަސީއަކީ ރާއްޖެއަކަށް ފެތޭނެ ޑިމޮކްރަސީއެއްނޫން. ރާއްޖޭގައި ބުދުކޯލުތަކެއް ނުބެހެއްޓޭނެ. ރާއްޖޭގައި އެއްޖިންސުން ކައިވެނި ކުރާކަށް ފުރުޞަތެއް ނުދޭނެ.
ދިވެހި މި ފަސްގަނޑުގައި ދިވެހިން ފައިތިލަތައް ސާބިތުކޮށްގެން ތިބިހާ ދުވަހު، އަދި ދިވެހި މިނިވަން ޖައްވުގައި ދިވެހި ދިދަ ވިހުރުވޭހާ ހިނދަކު މިފަސްގަނޑަކުން އެހެން ދީންތަކަކަށް ފުރުޞަތެއް ދިވެހިން ނުދޭނެ. ޤާނޫނު އަސާސީ އެކަމަކަށް ޖާގައެއް ނުދޭ.
ރާއްޖޭގައި އަބަދަށްޓަކައި އިސްލާމް ދީނުގެ ހިދާޔަތު ދެމިގެންދާނެގޮތްތަކާމެދު އަޅުގަނޑުމެން އަބަދުވެސް ވިސްނައި ފިކުރުކުރަންޖެހޭ. މިއަދުގެ ދުނިޔޭގައި އިންސާނުންގެ ސިކުނޑިތަކާއި މީހުންގެ ފިކުރާއި ޢަޤީދާއާ ކުޅެލުމަށް ބޭނުން ކުރަމުންދާ ހަތިޔާރަކީ ސޯޝަލް މީޑިއާ.
ސޯޝަލް މީޑިއާ ނަހަމަގޮތުގައި ބޭނުންކުރުމަކީ މިއަދު މުޅި ދުނިޔެ އެކަމުގެ އަވައިގައި ޖެހިފައިވާ ވަރަށް ނުރައްކާތެރި އިޖުތިމާޢީ ބަލިމަޑުކަމެއް. ދޮގު މަޢުލޫމާތުތައް ތެދުކަމަށް ޤަބޫލު ކުރެވޭ މިންވަރަށް މަސްނޫޢީގޮތެއްގައި އުފައްދައި މީހުންނާ ހަމައަށް ސޯޝަލް މީޑިއާއިން ފޯރުކޮށްދޭ. ރަނގަޅުނޫން އާދަތަކާއި އެހެން ދީންތަކުގެ ފިކުރުތައް ތުއްތު ދަރިފުޅުގެ ޅަ ސިނކުޑިއާ ސޯޝަލް މީޑިއާ މެދުވެރިކޮށް ކުޅެމުންދޭ. އެހެންވީމާ، ސޯޝަލް މީޑިއާގައި ދަރިފުޅާމެދު ހިނގާ މުޢާމަލާތްތަކާމެދު ބެލެނިވެރިން ވަރަށް ބޮޑަށް ފާރަވެރިވާންޖެހޭ. މައިންބަފައިން ދަރިންގެ އުޅުމަށް ސަމަލުވާންޖެހޭ.
ރާއްޖޭގައި ފެތުރެމުންދާ ލާދީނީ ފިކުރަނީ ރާއްޖޭގެ މިނިވަންކަމާއި އިސްތިޤުލާލަށް ކުރިމަތިވެދާނެ ނުރައްކަލެއް. ވަކިކަވި ފަރުދުންނަށްވެސް ކުރިމަތިވެދާނެ ނުރައްކަލެއް. މިކަންކަން ހުއްޓުވުމަށް ރައީސް ޔާމީންގެ ސަރުކާރުން ގެންދަވަނީ މަސައްކަތް ކުރައްވަމުން. އެ ކުރައްވަމުންގެންދަވާ މަސައްކަތުގައި އެންމެން ޝާމިލުވެ ބައިވެރިވާން އެބަޖެހޭ. މުޅި ދިވެހި އުންމަތް އެކުގައި އަތާއަތުގުޅާލައިގެން މަސައްކަތް ކުރަންޖެހޭ. އަޅުގަނޑުމެން ކޮންމެ ބެލެނިވެރިއަކު އަދި ކޮންމެ މުދައްރިސަކު މިކަމަށް ޚާއްޞަ ކަމާލުކަމެއް ދިނުމަކީ ހަމަ ކޮންމެހެންވެސް ކުރަންޖެހިފައިވާ ކަމެއް.
އާދެ! މިއަދުވެސް ރާއްޖޭގައި 9 ވަނަ ޙަސަން ރަސްގެފާނުފަދަ ބޭފުޅުން އުޅުއްވާނެކަން ދަންނަންޖެހޭ. އިސްލާމް ދީނާ ބީރައްޓެހި ޑިމޮކްރަސީއެއް ރާއްޖެއަށް ފެއްތުމަށް ކެނޑިނޭޅި މަސައްކަތް ކުރަމުންދާކަން ދަންނަންޖެހޭ. ދިވެހިންގެ ޢަޤީދާ ބަލިކަށިކޮށްލުމަށް ކެނޑިނޭޅި މަސައްކަތް ކުރަމުންދާކަން އަޅުގަނޑުމެން ދަންނަންޖެހޭ. އެހެން ދީނަތައް ފެތުރުމަށް ޖާގަ ހޯދަން މަސައްކަތް ކުރަމުންދާކަން ދަންނަންޖެހޭ. މިދެންނެވި ހުރިހާ ކަމަކަށް ހުޝިޔާރު ވުމަކީ ރާއްޖޭގައި އިސްލާމީ ހިދާޔަތާއި ދީނީ އެއްބައިވަންތަކަން ޙިމާޔަތްކުރުމަށްޓަކައި ކުރަންޖެހޭ ކަންތައްތައްކަމުގައި ދެކެން.
މިހިސާބުން އަޅުގަނޑުގެ ވާހަކަކޮޅު ނިންމާލަން ޤަޞްދުކުރަން. އަޅުގަނޑުގެ އިޚުލާޞްތެރި ދުޢާއަކީ އިސްލާމް ދީނުގެ ހިދާޔަތުގެ އަލީގައި ދިވެހި ޤައުމު އަބަދަށް ލެއްވުން. އިސްލާމް ދީނުގެ އަލިގަދަ ނޫރުން ދިވެހިންގެ ހިތްތައް އަލިކުރެއްވުން. ދިވެހިންނަކީ އިސްލާމް ދީނުގެ ރިވެތި ގަހަނާތަކުން ޒީނަތްތެރިވެފައިވާ ބަޔަކުކަމުގައި ލެއްވުން. އާމީން. ވައްސަލާމް ޢަލައިކުމް ވަރަޙުމަތުﷲ ވަބަރަކާތު.
2017، ސާފުނުވޭ