ބްލޮގް

• ޙާއްސަ ދުވަސް

ދިވެހި ނިއުސް އެޖެންސީ ހުޅުވުމުގެ ރަސްމިއްޔާތު

ދިވެހި ނިއުސް އެޖެންސީ ހުޅުވުމުގެ ރަސްމިއްޔާތުގައި މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ދެއްކި ވާހަކަ : ދިވެހިރާއްޖޭގެ އަޑުގެ ޖަލްސާކުރާ މާލަން، 2017

އިންސާނުން އެކި ޤައުމުތަކާއި އެކިޤަބީލާތަކުގައި ލައްވައި، އެއްބަޔަކު އަނެއް ބަޔަކަށް މުޢާޞަލާތާއި މުޢާމަލާތް ކުރުމުގެ މަތިވެރި ނިޢުމަތްތައް ދެއްވި ގަދަކީރިތިވަންތަ ﷲ ތަބާރަކަވަތަޢާލާ ގެ ޙަޟްރަތަށް ޙަމްދާ ޝުކުރުކުރަން.. ހެޔޮބަސްތަކުން ވާހަކަދެއްކުމާއި، ތެދު ޚަބަރު ދިނުމުގެ މުހިންމުކަން މި އުންމަތަށް ބަޔާންކޮށްދެއްވި މާތް ނަބިއްޔާ މުޙައްމަދު ޞައްލަﷲޢަލައިހި ވަސައްލަމްއަށް ޞަލަވާތާ ސަލާމްލެއްވުން އެދި ދުޢާކުރަން. މިޞަލަވާތާއި ސަލާމުގައި އެކަލޭގެފާނުގެ އިތުރު އާލުންނާއި މިތުރު ސަޙާބީން ޝާމިލުކުރަން.

(އެޑްރެސް ކުރުން)

އައްސަލާމް ޢަލައިކުމް ވަރަޙުމަތުﷲ ވަބަރަކާތު.

މިއަދު އަޅުގަނޑުގެ އެންމެ އިސް ވާޖިބެއްކަމުގައި ދެކެނީ ޕަބްލިކް ސަރވިސް މީޑިއާ ދިވެހި ދައުލަތުން އުފެއްދެވިތާ 2 އަހަރު ފުރުމުގެ މުނާސަބަތުގައި، މި މީޑިއާ ކުންފުނީގެ އެންމެހާ ވެރީންނާ މުވައްޒަފުންނަށް ތަހުނިޔާއާ މުބާރަކްބާދު އަރިސްކުރުން..

އެއާއެކު، މިއަދު އަލަށް ޕީއެސްއެމްގެ ކުޑައިގެ ދަށުން ޚިދުމަތްދޭން މިފެށި ދިވެހި ޤައުމީ ނިއުސް އޭޖެންސީގެ މަސައްކަތްތައް އިފްތިތާޙްކޮށްދިނުމުގެ ޝަރަފް އަޅުގަނޑަށް ދެއްވިކަމަށްޓަކައި ނުހަނު އިޚްލާޞްތެރިކަމާއެކު ޕީއެސްއެމްގެ ޓީމަށް ޝުކުރު ދަންނަވަން..

ނޫސްވެރިކަމާ، ރޭޑިއޯއާ، ޓީވީއާ، އިންޓަރނެޓްގެ ޚިދުމަތްވެސް ރާއްޖޭގައި ފެށިގެން މިއައީ 1900 ގެ އަހަރުތަކުގެ ތެރޭގައި.. އެހެން ގޮތަކަށް ދަންނަވާނަމަ 20 ވަނަ ޤަރުނުގެ ތެރޭގައި.. މީގެ ތެރެއިން ރާއްޖެއަށް އެންމެ ދޮށީ ނޫސްވެރިކަން..

ޤައުމީ ރޭޑިއޯއެއް ރާއްޖޭގައި އުފެދުނުތާ 50 އަހަރަށްވުރެ ގިނަވެއްޖެ.. ޤައުމީޓީވީގެ ޚިދުމަތް ދެމުންދާތާ އަންނަ އަހަރަށް 40 އަހަރުވާނެ.. އިންޓަނެޓްގެ ޚިދުމަތް ރާއްޖެއަށް ތަޢާރަފްވެ، ޚަބަރާ މަޢުލޫމާތުގެ އެންމެ ޒަމާނީ ވަސީލަތްތައް ރާއްޖެއަށް ފަހިވަމުންދާތާ 20 އަހަރުވެއްޖެ.. މުޅި ދުނިޔެއަށް ރާއްޖޭގެ ޚަބަރާ މަޢުލޫމާތު، އަދި ފޮޓޯއާ ވީޑިއޯގެ މަންޒަރުތައް ފުޅާދާއިރާއެއްގައި ފަތުރާނެ ޤައުމީ ވަސީލަތެއް މިއަދި މިދަނީ ޤާއިމު ކުރެވިގެން..

ޤައުމެއް ބިނާ ކުރުމުގައި ނޫސްވެރިކަމުގެ ދައުރު ވަރަށް މުހިންމު. ބިނާކުރަނިވި ޚިޔާލުތައް އުފެއްދުމުގެ އެންމެ މުހިންމު މަހައްލަކީ މީޑިއާ. ބިނާކުރަނިވި ޚިޔާލުތައް އުފެއްދުމުގައި ނޫސްވެރިކަމުގެ ދައުރު އެހާމެ ބޮޑު. ޤައުމު ތަރައްޤީ ކުރުމުގައި ޚިޔާލު ފާޅުކުރުމުގެ މިނިވަންކަން ވަރަށް މުހިންމު.

ކަލާންގެ ސަފުން ބަދަލު ނުކުރައްވަތޭ ޤައުމެއްގެ ޙާލާތު،

ނުވާނަމަ ޤައުމުގައި ޙާލަތު ބަދަލު ކުރުމުގެ ޚިޔާލާތު.

ދުނިޔޭގެ ކޮންމެ ޤައުމެއްގައިވެސް ޤައުމީ ނިއުސް އޭޖެންސީއެއް ޤާއިމުކޮށް، އެ ޤައުމެއްގެ ތެދު ޚަބަރާ މަޢުލޫމާތު މުޅިދުނިޔޭގެ މީޑިއާތަކަށް ފޯރުކޮށްދިނުމަކީ، ޤައުމުގެ ހައިބަތާ ސިޔާދަތު ދެމެހެއްޓުމުގައި ވަރަށް އިސްކަން ދެވެމުން އަންނަކަމެއް..

ދިވެހިރާއްޖެއަކީ ރީތި ޤައުމެއް. ޞުލްޙަމަސަލަސްކަމަށް ލޯބިކުރާ، ޞުލްހަވެރި އަމާން ޤައުމެއް. ދިވެހިންގެ ހިނިތުންވުމާއި މެހެމާންދާރީގެ ރިވެތި ސިފަތަކެއް ލިބިގެންވާ ބައެއް.

މިކަން މިހެން އޮތްނަމަވެސް، ދުނިޔޭގެ މަސްރަޙަށް ރާއްޖެ ވަރަށްބޮޑަށް ހުޅުވި، ސިޔާސީ ހަލަބޮލިކަން ރާއްޖޭގައި އިތުރުވާންފެށި ހިސާބުން އެކިމީހުން އެކި ވަސީލަތް ބޭނުންކޮށްގެން އެމީހަކަށް ފެނުނުގޮތަކަށް ޚަބަރާއި މަޢުލޫމާތު ދުނިޔޭގެ މީޑިއާތަކަށް ފޮނުވައި، އެމީހަކު ބޭނުންވާ ކަހަލަ ވަކިވަކި ފޮޓޯތަކާއި މަންޒަރުތައް އުފައްދައި ދުނިޔޭގެ މީޑިއާތަކަށް ފޯރުކޮށްދޭން ފެށުމުގެ ނަތީޖާއަކީ، ރާއްޖެއަކީ ވަރަށް ނާމާން، ވަރަށް އަނިޔާވެރި، ހަރުކަށި ޚިޔާލުގެ މީހުންގިނަ ޤައުމެއްގެ ގޮތުގައި ދުނިޔޭގެ ބައެއް މީޑިއާތަކުގައި ޚަބަރު ކިޔަން ފެށުން.

މިއީ ވަރަށް ހިތްދަތި ވާހަކައެއް.. އެހެން ނަމަވެސް އެ ދުވަސް އަދި އެޙާލަތު ދިވެހި ޤައުމު ދެކެފި.. އޭގެ ސަބަބުން މި ވަޠަނާ މި އުންމަތަށް މީން ދުވަހަކު ކުރިމަތިނުވާހާ ފިއްތުމާ ދަތިކަންވެސް އަޅުގަނޑުމެން ތަޙައްމަލުކުރަންޖެހޭ. މިއީ ވަރަށް ހިތާމަހުރި ކަމެއް. އަދި ޤައުމު ދެކެ ލޯބިވާ އެއްވެސް ދިވެހި ދަރިއަކު ބަލައިގަންނާނެ ކަމެއް ނޫން. އެކަން ކަން ކުރަމުން އެދަނީ ޤައުމުގެ ޢަދުއްވުން.

ރައީސް ޔާމީންގެ ޒަޢާމަތުގައި އެމަނިކުފާނުގެ އެންމެ ބޮޑު އިސްކަމެއްދެއްވި އެއް ކަމަކީ ރާއްޖޭގެ ޚާރިޖީ ސިޔާސަތު ހަރުދަނާކުރެއްވުން.. ދިވެހީންގެ ހަމަތަކާއި އުޞޫލުތަކުގައި ގަދަޔަށް ހިފެހެއްޓެވުން.. ކޮންމެ ބަޔަކު ކޮންމެ ނުފޫޒެއް ފޯރުވާން އުޅުނަސް، އިސްލާމްދީނާއި، ރާއްޖޭގައި އޮތް އަމާންކަމާއި، ޤާނޫނީ ޙުކޫމަތުގެ ބިންގާތަކަށް ގުޑުން އަރާނެ އެއްވެސް ކަމަކަށް މި ފަސްގަނޑުން ޖާގަނުދެއްވުން..

އިރާދަކުރެއްވިއްޔާ ރައީސް ޔާމީންގެ މި އަގުހުރި ޤައުމީ ސިޔާސަތުގެ ސަބަބުން ތަރައްޤީއާ، ތަމައްދުން، އަދި ޞުލްޙަވެރިކަމާ ޤާނޫނުގެ ވެރިކަމުގެ މަންފާ ދިވެހި ރައްޔިތުންނަށް މިއަދު ކުރަމުންދޭ..

ދިވެހި ޤައުމީ ނިއުސް އޭޖެންސީއެއް އުފެދިގެން ދިއުން މިއީ، ރާއްޖޭގެ ތެދު ޚަބަރާ މަޢުލޫމާތު، ރާއްޖޭގެ ހަޤީޤީ ރީތިކަމާ އަމާންކަމާ، ރައްޔިތުންގެ އުފާފާގަތިކަމާ ތަރައްޤީގެ ފޮޓޯއާ މަންޒަރު މުޅި ދުނިޔޭގެ މީޑިއާތަކަށް ފޯރުކޮށްދިނުމަށް ސަރާސަރުމަގެއް ހުޅުވުން..

ދުނިޔޭގައި ނިއުސް އޭޖެންސީތަކަކީ މީޑިއާގެ ވިޔަފާރިކޮށްގެން ފައިދާ ހޯދާ އިދާރާތަކެއް.. އަޅުގަނޑުގެ އުންމީދަކީ، ރާއްޖޭގައި ދުވަހުންދުވަހަށް ހިނގާ ހުރިހާ ކަންކަމުގެ ސާފު މަޢުލޫމާތާ ފޮޓޯ ވީޑިއޯ، އަދި ރާއްޖޭގެ ރީތިކަމާ ތަރައްޤީގެ ވާހަކަތައް ދުނިޔޭގެ ހުރިހާ މީޑިއާތަކަށް ފޯރުކޮށްދީގެން ވިޔަފާރީގެ ރަނގަޅު މަންފާއެއް ހޯދާނެ އިދާރާއަކަށްވެސް ދިވެހި ނިއުސް އޭޖެންސީވުން..

ޤައުމީ ނިއުސް އޭޖެންސީއެއް ހިންގުމުގެ މަސައްކަތަކީ ކުޑަ މަސައްކަތަކަށް ނުވާނެ.. މުޅި ރާއްޖޭގައި ހިނގާ ހުރިހާކަމެއްގެ ޚަބަރުދަބަރު އެއްތާކަށް ޖަމާކުރުމަކީ ވަރަށް ބުރަ މަސައްކަތެއް.. އަދި ދުނިޔޭގެ އެކި ކަންކޮޅުތަކަށް މި މަޢުލޫމާތު ފޯރުކޮށްދިނުމަކީ ޓެކްނޮލޮޖީގެގޮތުންވެސް ވަސީލަތްތައް ތަނަވަސްކޮށްގެން ނޫނީ ނުކުރެވޭނެކަމެއް.. އަޅުގަނޑުގެ ހިތުގައި އޮތް އިތުބާރަކީ އަދި ޔަޤީންކަމަކީ މިދިޔަ 2 އަހަރުދުވަހުގެ ތެރޭގައި މީޑިއާގައި ހީނުކުރާވަރުގެ ކާމިޔާބުތަކެއް ޕަބްލިކް ސަރވިސް މީޑިއާއިން ދެއްކެވި ފަދައިން، ދިވެހި ޤައުމީ ނިއުސް އޭޖްސީގެ މަސައްކަތްވެސް މުޅި ޤައުމަށް ފަޚުރެއްގެ ގޮތުގައި ކާމިޔާބު ކުރެއްވުން..

އަޅުގަނޑު އުންމީދުކުރަނީ، މިއަދު މި ފަށައިގަތް ދިވެހި ޤައުމީ ނިއުސް އޭޖެންސީ އަކީ ދިވެހީންގެ ހަޤީޤީ ސިފަތައް މުޅި ދުނިޔެއަށް ދައްކާނެ ވަސީލަތަކަށް ވާނެކަމަށް.. ދިވެހިރާއްޖޭގެ އަޖައިބެއްފަދަ ޤުދުރަތީ ރީތިކަން.. ދުނިޔޭގައި ނެތްވަރުގެ ޞުލްޙަ މަސަލަސްކަން.. ހިމޭންކަން.. އަމާންކަން.. ރައްޔިތުންގެ ހިނިތުންވުމާ މެހެމާންދާރީ.. އިރުގެ އަލިކަމާ ހަނދުވަރުގެ ރީތިކަމާއެކު ގޮނޑުދޮށްތަކާ މޫދުން އެފެންނަ ޗާލުކަން.. ކަނޑުއަޑީގެ ނަލަނަލަ ބަގީޗާތައް. ނޭވާލާން ސާފު ރީތި ޖައްވު.. ދިވެހިންގެ ދިރިއުޅުން، އަދި ރާއްޖޭގައި ހިނގާ ކަންކަން ރާއްޖޭގެ ޤައުމީ ނިއުސް އެޖެންސީން ދިނިޔެއަށް ކިއްކައިދިނުން.

 

ދިވެހި ނިއުސް އޭޖެންސީއިން ފެއްސާ ރަތާ ހުދުގެ ޤައުމީ ކުލަތަކާއެކު ރާއްޖޭގެ ހަގީގީ ވާހަކައާ މަންޒަރު އަދި ރާއްޖޭގެ ހަގީގީ ހައިބަތު މުޅި ދުނިޔޭގައި އުފުލާލަދިނުން. ވައްސަލާމް ޢަލައިކުމް ވަރަޙުމަތުﷲ ވަބަރަކާތު.