ބްލޮގް

• ތަޢުލީމް

ޤައުމީ މަންހަޖު ތަންފީޒުކުރާ ދަރުބާރު

ޤައުމީ މަންހަޖު ތަންފީޒުކުރާ ދަރުބާރުގައި މިނިސްޓަރ އޮފް ސްޓޭޓް ފޮރ އެޑިޔުކޭޝަން އާދަމް ޝަރީފު ޢުމަރު ދެއްކެ ވާހަކަ : ކުއްލިއްޔަތުލްދިރާސާތުލް އިސްލާމިއްޔާގެ ހޯލް، 23 މާރިޗު 2015

އުގަންނައިދިނުމަކީ އަޅުކަމެއްކަމުގައި ލެއްވި، ދަގަކީރިތިވަންތަ ﷲ ސުބުޙާނަހޫ ވަތަޢާލާއަށް ޙަމްދާ ޝުކުރުކުރަން. ދެދުނިޔޭގެ ބާއްޖަވެރިކަން ލިބެނިވި ރިސާލަތައިގެން މިއުންމަތަށް ކައުކުރެއްވި ސާހިބާ މުޙައްމަދު ޞައްލަﷲ ޢަލައިހި ވަސައްލަމައަށް ޞަލަވާތާއި ސަލާމް ލެއްވުންއެދި ދުޢާކުރަން.

(އެޑްރެސް ކުރުން)

އައްސަލާމް ޢަލައިކުމް ވަރަޙުމަތުﷲ ވަބަރަކާތު.

މަދަރުސީ ތަޢުލީމުގެ ޤައުމީ މަންހަޖު ތަންފީޒުކުރާ މިދަރުބާރުގައި އަޅުގަނޑުގެ އެންމެ އިސް ވާޖިބެއްކަމުގައި ދެކެނީ މިދަރުބާރަށް ތިޔަބޭފުޅުން ތިޔަ ބެހެއްޓެވި ޝައުޤުވެރިމަށްޓަކައި މިނިސްޓްރީ އޮގް އެޑިޔުކޭޝަނާއި އެން.އައި.އީ ގެ އެންމެހާ މުވައްޒަފުންގެ ނަންފުޅުގައި ހިތުގެ ފުންމިނުން ޝުކުރު ދެންނެވުން. ޚާއްޞަގޮތެއްގައި މިދަރުބާރުގައި ތިޔަ ބޭފުޅުން ބައިވެރިވެވަޑައިގަންނަވާކަމީ ޤައުމީމަންހަޖު ތަންފީޒު ކުރުމުގައި ސަރުކާރުން ދެއްވާ އިސްކަން ވަރަށް ފާޅުކަންބޮޑުގޮތެއްގައި އެނގިގެންދާކަމެއް.

އާދެ، މަދަރުސީ ތަޢުލީމުގެ ޤައުމީ މަންހަޖު ތަންފީޒު ކުރުމާހަމައަށް މިއާދެވުނީ އެން.އައި.އީގެ ވަރަށް ގިނަ މުވައްޒަފުންގެ، އަގު ނުކުރެވޭފަދަ ޚިދުމަތްތަކެއްގެ ސަބަބުން. އެކަމަށްޓަކައި، އެހުރިހާ ބޭފުޅުންނަށް އަޅުގަނޑު ހިތުގެ ފުންމިނުން ޝުކުރު ދަންނަވަން.

މިވޭތުވެ ދިޔަ ދުވަސްތަކުގައި އެން.އައި.އީގެ ބައެއް މުވައްޒަފުން، ލޯބިވާ ޢާއިލާއާ ދުރުގައި، ރޭގަނޑުވެސް މަންހަޖާގުޅޭ މަސައްކަތުގައި، ވަޤުތު ހޭދަކޮށްފައިވޭ. ވުމާއެކު އެ ހުރިހާ މުވައްޒަފުންގެ އާއިލާތަކުގެ ކެތްތެރިކަމާއި ދެއްވި ހިތްވަރަށްޓަކައި އަޅުގަނޑު އެއާއިލާތަކަށް ވަރަށް ލޯތްބާއެކު ހިތުގެ ފުންމިނުން ޝުކުރު ދަންނަވަން. މި ޝުކުރުގައި އަޅުގަނޑު ލޯބިވާ އާއިލާވެސް ހިމަނަން.

އަދި މިރޭގެ މިދަރުބާރަށް ތައްޔާރުވުމުގައިވެސް އެން.އައި.އި އާއި މިނިސްޓްރީ އާއި މާލޭގެ ސްކޫލްތަކުން، ޚާއްޞަގޮތެއްގައި ޖަމާލުއްދީން ސްކޫލުގެ ވެރިންނަށާއި ހުރިހާ މުވައްޒަފުންނާއި ބެލެނިވެރިންނާ ދަރިވަރުން ދެއްވާފައިވާ އެހީތެރިކަމަށްޓަކައި ޚާއްޞަ ޝުކުރެއް ދަންނަވަން. ތަޢުލީމީ ދާއިރާއަށް ހެޔޮއެދިވަދައިގަންނަވާ، ވަރަށް ގިނަ އެހެން ބޭފުޅުންވެސް، ޤައުމީ މަންހަޖު އެކުލަވައިލުމުގައި ފަންނީގޮތުން އެހީތެރިވެދެއްވާފައިވާކަން އަޅުގަނޑު ފާހަގަކުރަން. މި މުހިންމު މަސައްކަތް ކުރިއަށް ގެންދިއުމަށް ހިތްވަރު ދެއްވިކަމަށްޓަކައި ނައިބު ރައީސް މުޙައްމަދު ޖަމީލު އަޙުމަދަށާއި މިނިސްޓަރ ޑޮކްޓަރ ޢާއިޝަތު ޝިހާމަށް ޝުކުރު ދަންނަވަން. ޚާއްޞަގޮތެއްގައި ޤައުމީ މަންހަޖު ފަރުމާކޮށް، ނިންމަންޖެހޭ ނިންމުންތައް ނިންމުމުގައި ރައީސް ޔާމީންގެ ސަރުކާރުން ދެއްކެވި ހަރުދަނާ ލީޑަރޝިޕަށްޓަކައި އެމަނިކުފާނަށް ވަރަށް އިޚުލާޞްތެރިކަމާއެކު ތަހުނިޔާ ދަންނަވަމުން ފަށްފަށުން ޝުކުރު ދަންނަވަން.

މާތް ﷲ ގެ ވާގިފުޅާއެކު، ކުރިމަގުގައިވެސް އަޅުގަނޑުމެން އެން.އައި.އީ ގެ ހުރިހާ މުވައްޒަފުން ޤައުމީ ޚިދުމަތުގައި، ދިވެހިރާއްޖޭގެ ތަޢުލީމު ކުރިއަރުވައި ތަރައްޤީ ކުރުމުގެ ނާރެހެއްގެގޮތުގައި ދެމިތިބޭނެކަމުގެ ޔަޤީންކަން ތިޔަ އެންމެހާ ބޭފުޅުންނަށް އަރުވަން.

އާދެ! މަދަރުސީ ތަޢުލީމުގެ ޤައުމީ މަންހަޖު ތަންފީޒުކުރާ މި ދަރުބާރުގައި ދިވެހިރާއްޖޭގެ މަދަރުސީ ތަޢުލީމުގެ ޤައުމީ މަންހަޖު ގެތެމުން އައިސްފައިވާގޮތް، ތާރީޚީ ނަޒަރަކުން ބަލައިލުމަކީ ބޭނުންތެރިކަމެއްކަމުގައި ދެކެން.

ރާއްޖޭގައި މީހުން ވަޒަންވެރިވެ އުޅެން ފެށީއްސުރެ ކޮންމެވެސް ސިފައެއްގައި ތަޢުލީމު ދެވެމުން އައިސްފައިވާކަން ދިވެހިތާރީޚުން ސާބިތުވޭ. މީގެ 100 އަހަރު ކުރިންވެސް ރާއްޖޭގައި 498 މަކްތަބް ހުރި. އޭގެ 10 އަހަރު ފަހުގެ ބޯހިމެނި ހިސާބު ދައްކާގޮތުން ރާއްޖޭގައި 839 މަކުތަބު ހުރި. އޭގެ ތެރޭގައި ޢަރަބި ބަސް ކިޔަވައިދޭ 4 މަކްތަބު ހުރިކަންވެސް ފާހަގަ ކުރެވޭ. މި ބޯހިމެނުގެ ހިސާބު ދައްކާގޮތުން ޢުމުރުން 3 އަހަރާއި 15 އަހަރާ ދެމެދުގެ ކޮންމެ 28 ކުއްޖަކަށް މަކްތަބެއް ހުރި.

ރަސްމީ ލިޔުންތަކުން ފެންނަގޮތުގައި ރާއްޖޭގައި ފުރަތަމަ ތަޢުލީމުގެ މަންހަޖެއް އެކުލަވައިލެވުނީ 1940 ގެ އަހަރުތަކުގައި. މިމަންހަޖުގައި އިލްޒާމީ ތަޢުލީމް އިބުތިދާޢީ ތަޢުލީމު އަދި ސާނަވީ ތަޢުލީމުގެ ހަރުފަތްތައް ހިމެނޭ. މިމުޤައްރަރުތައް ލިޔެވި ރަސްމީ ސިފައެއްގައި ޝާއިޢު ކުރެވުނީ 1955 ވަނަ އަހަރު. ރާއްޖޭގައި އިނގިރޭސި ބަހުން ކިޔަވައިދޭން ފަށާފައިވަނީ، 1960 ވަނަ އަހަރު، ޔުނިވަރސިޓީ އޮފް ލަންޑަންގެ މުޤައްރަރުތައް ބޭނުންކޮށްގެން. އަދި އޭ ލެވެލް ތަޢާރަފު ކުރެވުނީވެސް އެ ޔުނިވަރސިޓީގެ މުޤައްރަރުތަކެއްގެ އެހީގައި. 1978 ވަނަ އަހަރާ ޖެހެންދެން މާލޭގައި އިގިރޭސި ބަހުން ކިޔަވައިދޭ މަދަރުސާތައް ފިޔަވައި، ރާއްޖޭގެ އެހެން މަދަރުސާތަކުގައި ބޭނުން ކުރަމުން ދިޔައީ އެތަންތަނުގެ އަމިއްލަ މުޤައްރަރުތަކެއް. ކިޔަވައިދެމުން ދިޔައީ އެމުދައްރިސަކަށް ކިޔަވައިދޭން ފެނުނު އެއްޗެއް. ނުވަތަ އެ މުދައްރިސަކަށް އެނގޭ އެއްޗެއް. ނަމަވެސް 1978 ވަނަ އަހަރުގެ ކުރީކޮޅު، ޔުނިސެފްގެ އެހީއާއެކު ރާއްޖޭގައި ހުޅުވުނު ފުރަތަމަ ކޮމިޔުނިޓީ ސްކޫލްގައި ކިޔަވައިދިނީ އެތަންތަނުގައި ކިޔަވައިދިނުމަށް ތައްޔާރުކުރެވިފައިވާ ވަކި މުޤައްރަރަކަށް. އެހިސާބަށް ދިޔައިރު ފަށާ ތަޢުލީމުގެ މުޤައްރަރެއް އޮތުމަކީ ބޭނުންކަމެއްކަމުގައި ފާހަގަކުރެވުނު.

އެހެންކަމުން 1980 ވަނަ އަހަރު ޕްރައިމަރީ ތަޢުލީމުގެ ފަސް އަހަރުގެ މުޤައްރަރު ފޮތެއް މިނިސްޓްރީ އޮފް އެޑިޔުކޭޝަނުން ޝާއިޢުކުރެވުނު. ދެ އަހަރު ދުވަހުގެ ތަޖުރިބާއަށްފަހު، ފާހަގަ ކުރެވުނު ކަންކަމުގެ އަލީގައި މި މުޤައްރަރު އިސްލާޙުކޮށް މުޤައްރަރުތައް ތަންފީޒު ކުރަން ފެށުނީ 1984 ގައި.

އެހެންނަމަވެސް، ބެލެނިވެރިން ދިޔައީ ސަރުކާރުން ފުޅާކުރަންފެށި ތަޢުލީމު ދަރިވަރުންނަށް ހޯދައިދިނުމަށް އިންތިހާއަށް މަސައްކަތް ކުރަމުން. އިސާހިތަކު ރަށްރަށުގެ މެދުގައި، ސްކޫލްތަކުގެ މެދުގައި ވާދަވެރިކަން އުފެދި، ސްކޫލްތަކުގެ މޮޅުދެރަ ކިޔަން ފަށައިފި. އަދި ލަސްތަކެއް ނުވެ އެކި އިމްތިހާންތަކުން މަތީ ނަތީޖާތައް ހޯދާ ސްކޫލްތަކަށް ސަރުކާރުންނާއި ބެލެނިވެރިންވެސް އިނާމު ދޭން ފަށައިފި.

ނަތީޖާއެއްގެގޮތުން އިމްތިޙާންތަކުން މަތީ މާކްސް ލިބޭގޮތަށް ސްކޫލްތަކުގެ ހިންގުން ބަދަލުވާން ފެށި. ކުދިންގެ ކިބައިގާ އަށަގަންނަވަންޖެހޭ ހުނަރުތަކާއި ތަރުބަވީ ސިފަތަކަށް ހޭދަކުރަންޖެހޭ ވަގުތާއި ދޭންވާ އަހަންމިއްޔަތުވެސް ކުޑަވި. އިތުރު ޙަރަކާތްތައް ހުއްޓާލި ބައެއް ސްކޫލްތައް އޭރު ހުރި. އަނެއްކޮޅުން ތަފާތު ސަބަބުތަކާހުރެ، މަންހަޖާއި މުޤައްރަރުތަކަކީ ސްކޫލްތަކަށްވެސް ބީރައްޓެހި އެއްޗަކަށްވި. ހަމައެކަނި ޓެކްސްޓް ފޮތްތަކަށް ބަރޯސާވާން ފެށި. އަދި ވަކި އުޞޫލެއްނެތި، މަޑުމަޑުން އިނގިރޭސި މީޑިއަމުން ކިޔަވައިދޭން ފެށި.

އެ މަންހަޖުން ނިކުތް ނަތީޖާއާގުޅޭ ޢިލްމީ ދިރާސާއެއް ހެދިފައިނެތްނަމަވެސް މިއަދު އަޅުގަނޑުމެންނަށް އެއްކޮޅުން މިފެންނަނީ ރާއްޖޭގެ އިޖުތިމާޢީ ފޭރާން މުޅިން ފުނޑުފުނޑުވެފައިވާތަން. އިޖުތިމާޢީ އަދާލަތު ގެއްލިފައިވާތަން. ޒުވާނުންގެ ގިނަ ބަޔަކު ވަޒީފާއެއްނެތި މަގުމަތިވެފައިވާތަން. މަސްތުވާ ތަކެތީގެ ވަބާގައިޖެހި ދަނގަނޑު ތޭރިތަކުގެ ފަހަތުގައި، ކަސްތޮޅު އެޅިފައިވާތަން. ޤަޞްދުގައި މީހުން މެރުމާއި މީހުން ވަގަށް ނެގުމާއި މާރާމާރީ ހިންގުމާއި ފޭރުމާއި ލޫޓްވުންފަދަ ކަންކަން އިތުރުވަމުންދާ ތަން. ބޭރު މީހުންނަށް ރޭރުވެ ލިބޭ މަދު ލާރިކޮޅުވެސް ބޭރު މީހުންގެ މުސާރައަށްދީ، ޤައުމަށް ލިބޭ އާމްދަނީ، ޑޮލަރަށް ބަދަލުކޮށް ބޭރަށް ފޮނުވަމުންދާތަން.

އާދެ! މިއަދު އަޅުގަނޑުމެންނަށް ފެންނަން އޮތް އަނެއް ޙަޤީޤަތަކީ ވޭތުވެދިޔަ ސާޅީހަކަށް އަހަރުގެތެރޭގައި ރާއްޖެއަށް ލިބިފައިވާ ތަރައްޤީއާއި ތަހުޒީބާއި ތަމައްދުންގެ ޙަޤީޤީ މޭސްތިރިންނަކީވެސް ހަމަ ދިވެހިންކަން. ތަޢުލީމީ ނިޒާމުގައި މިއަދު ގިނައީ މައް ދިވެހިން. ސްކޫލްތައް ހިންގަވަން ގިނައިން ތިއްބެވީ ތަޢުލީމީ، ދިވެހި ޕްރިންސިޕަލުން. ދައުލަތުގެ ގިނަ މުއްއައްސަސާތަކުގެ ވެރިންގެގޮތުގައި ތިއްބެވީ މަތީ ތަޢުލީމު ޙާޞިލުކޮށްގެން ތިއްބެވި ދިވެހި ޒުވާނުން.

1984 ވަނަ އަހަރު ތަންފީޒު ކުރަން ފެށި މަންހަޖު، 2000 ވަނަ އަހަރު އިޞްލާޙު ކުރެވުނެވެ. އަދި އިޞްލާޙުކުރި މުޤައްރަރު އަލުން މުރާޖަޢާ ކުރުމުގެ މަސައްކަތް 2006 ވަނަ އަހަރުން ފެށިގެން ކުރިއަށް ގެންދެވުނު. މިދެންނެވި މަޝްވަރާތަކާއި ދިރާސާތަކުން ފާހަގަ ކުރެވުނީ ޤައުމީ މަންހަޖަށް ގިނަގުނަ ބަދަލުތަކެއް ގެންނަންޖެހޭކަމަށް.

ވުމާއެކު، 2009 ވަނަ އަހަރު ޤައުމީ މަހާސިންތާއެއް ބާއްވައި، އައު ޤައުމީ މަންހަޖެއް އެކުލަވައިލުމަށް ސަރުކާރުން ނިންމި. މަދަރުސީ ތަޢުލީމުގެ ޤައުމީ މަންހަޖުގެ ފުރަތަމަ ދެލިކޮޕީ އެކުލަވައިލެވުނީ 2010 ވަނަ އަހަރު. މި މަސައްކަތް ކުރެވިފައިވަނީ ބައިނަލްއަޤްވާމީ ފަންނީ މާހިރުންގެ ލަފާވެސް ހޯދައިގެން. އެއަށްފަހު 2011 ވަނަ އަހަރު ޤައުމީ މަންހަޖަށް ބޭނުންވާ މުޤައްރަރުތައް ތައްޔާރު ކުރުމުގެ މަސައްކަތް ފެށުނު. އަދި އެ މުޤައްރަރުތަކުގެ އަޖުމަބެލުން، ރާއްޖޭގެ ތަފާތު 6 ސްކޫލެއްގައި ފެށިގެން ކުރިއަށް ގެންދެވުނު.

އެނގިވަޑައިގަންނަވާނޭފަދައިން، ދިވެހިރާއްޖޭގެ މަދަރުސީ ތަޢުލީމުގެ ޤައުމީ މަންހަޖަކީ އުނގެނުމާއި އުނގަންނައިދިނުމާގުޅޭ އެންމެ މުހިންމު ތަޢުލީމީ ސިޔާސަތު. ޤައުމީ މަންހަޖުގައި ބަޔާންކޮށްފައިއެވަނީ ދިވެހިރާއްޖޭގެ މަދަރުސާތަކުގައި އުނގަންނައިދޭ ތަފާތު މަރުޙަލާތަކުގައި އުނގެނުމާއި އުނގަންނައިދިނުމުގެ އެންމެހައި ކަންކަން ތަރުތީބު ކުރެވިފައިވާގޮތް.

ރާއްޖޭގައި މަދަރުސީ ތަޢުލީމުގެ ޢާންމު ޤައުމީ މަންހަޖެއް ފުރަތަމަ އެކުލަވައިލިތާ 30 އަހަރު ފަހުން، މުޅިން އައު ޤައުމީ މަންހަޖެއް ތަންފީޒު ކުރުމަށް، މާތް ﷲގެ ޙަޟުރަތުން ވާގިއެދޭޙާލު، މިއަދު އަޅުގަނޑުމެން މިދަތުރު ފަށަނީ މިޤައުމަށް ހެވާއި ލާބައާއި އިތުރު އަރުތަތަކަށް އެދިގެން. އައު ޤައުމީ މަންހަޖުގެ މަސްދަރަކީ އިސްލާމް ދީން. މަންހަޖުގެ ތަޞައްވުރަކީ "ކުދިން ދިރިއުޅުމަށް ތައްޔާރުކުރުން".

މިތަޞައްވުރަށް ވާޞިލުވުމަށްޓަކައި ދަރިވަރުންނަކީ އިސްލާމީ ޢަޤީދާ ވަރުގަދަ، އަމިއްލަވަންތަކަމާއި ދިވެހި ޤައުމިއްޔަތު ދަމަހައްޓާ، ޤާބިލު އަދި އަމިއްލަ ނަފުސަށް އިތުބާރުކުރާ ފަރުދަކަށް ހަދަންޖެހޭ. އުނގެނުމާއި ހޯދާބެލުމަށް ޝައުޤުވެރިވާ، ޢިލްމު އުފައްދާ، ކާމިޔާބު ފަރުދަކަށް ހަދަންޖެހޭ. ތިމާގެ ޢާއިލާއާއި މުޖުތަމަޢާއި ބަވަނަވަމުންދާ ދުނިޔޭގައި ޙިއްޞާއަދާކުރާ، އުފެއްދުންތެރި އަދި ޒިންމާދާރު ފަރުދަކަށް ހަދަންޖެހޭ.

ޤައުމީ މަންހަޖު ތައްޔާރު ކުރުމުގައި ދިމާވި އެންމެ ބޮޑު ގޮންޖެހުމަކީ ޤައުމުގައި މިފަދަ ބޮޑު ބަދަލަކަށް ބޭނުންވާނެ ވަޞީލަތް ނެތުން. ޤާބިލުކަން ނެތުން. ޢިލްމީ ލިޔުންތެރިން މަދުވުން، ކުރެހުންތެރިން މަދުވުން، ރެފަރެންސް ފޮތް ނެތުން.

އެހެންނަމަވެސް، މިއަހަރު މަންހަޖު ތަންފީޒު ކުރަން މިފަށަނީ 103 ފޮތް ލިޔެ ތައްޔާރުކޮށްގެން. މި ފޮތްތަކަކީ ވޯލްޑް ކްލާސް ފެންވަރުގެ ، ކުދިންނާ ގުޅޭގޮތަށް ކުލަކޮށް ތައްޔާރުކޮށްފައިވަ ފޮތްތަކެއް. ހުރިހާ މާއްދާއެއްގެ މުޤައްރަރުތައްވެސް އެކުލެވިފައި އެވަނީ އެހެން ކުދިންގެ ކިބައިގައި އަށަގަންނަވަން ބޭނުންވާ ޤާބިލިއްޔަތުތައް ފުރިހަމައަށް އަށަގަންނަގޮތަށް.

ހުރިހާ މުދައްރިސުންނާއި ޕްރިންސިޕަލުން ވަނީ ތަމްރިނު ކުރެވިފައި. ބެލެނިވެރިން ދަނީ މަންހަޖަށް އަހުލުވެރި ވަމުން. އިތުރު ތަމްރީން ޕްރޮގްރާމްތަކާއި މުދައްރސިނުންގެ ފެންވަރުމަތިކުރުމުގެ ޕްރޮގްރާމްތައް މި ދަނީ ހިންގަމުން.

އާދެ! ޤައުމީ މަންހަޖު ތަންފީޒު ކުރުމުގައި ވިސްނަންވީ ކަމަކީ އުނގަންނައިދިނުމުގައި ދަރިވަރުން ޢަމަލީގޮތުން ބައިވެރިކުރުމަށް. ތަރުބިއްޔަތު ކުރުމުގެ ތަފާތު އުކުޅުތައް ބޭނުންކުރުމަށް އަދި، ދަރިވަރުންގެ ރޫޙާނީ، ޖިސްމާނީ، އިޖުތިމާޢީ، ދުޅަހެޔޮކަމަށް ހަމަހަމަގޮތެއްގައި ބާރު އެޅުމަށް. މި މަންހަޖު އެންމެ ފުރިހަމަގޮތުގައި ތަންފީޒުކޮށް، އެދެވޭ ނަތީޖާއެއް ހޯދޭނީ މުޖުތަމަޢުގެ އެންމެހާ ފަރުދުންގެ އެއްބާރުލުން ލިބިގެން. މުޖުތަމަޢުން ރިވެތި ނަމޫނާ ދެއްކިގެން.

މިރޭ އަޅުގަނޑުގެ އިލްތިމާސަކީ ޤައުމީ މަންހަޖުގެ މައިގަނޑު އަސާސްތަކުގެ މަތީގައި ސްކޫލްތަކުގެ އުނގެނުމާއި އުނގަންނައިދިނުމާއި އިތުރު ޙަރަކާތްތަކުގެ އެންމެހާ ކަންކަން ތަރުތީބު ކުރެއްވުން. އިސްލާމް ދީނާއި ދިވެހިއާދަކާދައާ އިދިކީލި އެންމެހާ ކަންކަމުން ދިރިވަރުން ދުރުހެލި ކުރުވައި، ދަރިވަރުންނަށް ދެ ދުނިޔޭގެ ބާއްޖަވެރިކަން ލިބޭނެގޮތަށް ދިރިއުޅެން ދަސްކޮށްދިނުމުގެ މަތިވެރި އަޒުމުގައި ސްކޫލްގެ މުޖުތަމަޢު މަސައްކަތްކޮށްދެއްވުން.

އާދެ! އަޅުގަނޑުގެ އިޚުލާޞްތެރި ދުޢާއަކީ އައު ޤައުމީ މަންހަޖުގެ ސަބަބުން ދިވެހި ކިޔަވާ ކޮންމެ ކުއްޖަކީ "އުނގެނުމަށް ޝައުޤުވެރިވާ، އިސްލާމް ދީނާއެއްގޮތަށް ޢަމަލުކުރާ، ޒިންމާދާރު އަދި އުފެއްދުންތެރި ފަރުދަކަށް ވުން" މިމަންހަޖުގެ ސަބަބުން ދިވެހި ޤައުމަށް ފާގަތި މުސްތަޤުބަލެއް މިންވަރު ކުރެއްވުން. މާތް ﷲ އަޅުގަނޑުމެން މިފަށާ މަސައްކަތަށް ތައުފީޤު ދެއްވާށި. އާމީން.

 

ވައްސަލާމް ޢަލައިކުމް ވަރަޙުމަތުﷲ ވަބަރަކާތު.