ބްލޮގް

• ތަޢުލީމް

ޤައުމީ މަންހަޖަށް މުދައްރިސުން ތަމްރީނުކުރަން ފެށުމުގެ ރަސްމިއްޔާތު

ޤައުމީ މަންހަޖަށް މުދައްރިސުން ތަމްރީނުކުރަން ފެށުމުގެ ރަސްމިއްޔާތުގައި މިނިސްޓަރ އޮފް ސްޓޭޓް ފޮރ އެޑިޔުކޭޝަން އާދަމް ޝަރީފު ޢުމަރު ދެއްކެ ވާހަކަ : 21 އެޕްރީލް 2015

ޢިލްމު އުގަންނައިދިނުމަކީ އަޅުކަމެއްކަމުގައި ލެއްވި، އަދި އެންމެހާ ކަންތައްތައް އެންމެ މޮޅަށް ދެނެވޮޑިގެންވާ ދަގަކީރިތިވަންތަ ﷲ ސުބުޙާނަހޫ ވަތަޢާލާއަށް ޙަމްދާ ޝުކުރުކުރަން. މަޝްވަރާގެ މަތިވެރި އުޞޫލުން ކަންކަމުގެ ޙައްލު ހޯއްދެވުމުގެ އެންމެ ފުރިހަމަ ނަމޫނާއެއްކަމުގައިވާ މިއުންމަތުގެ ލޮބުވެތި ސާހިބާ މުޙައްމަދު ޞައްލަﷲ ޢަލައިހިވަސައްލަމައަށް ޞަލަވާތާއި ސަލާމް ލެއްވުންއެދި ދުޢާ ކުރަން. މި ޞަލަވާތާއި ސަލާމުގައި އެމާތް ނަބިއްޔާގެ އިތުރު އާލުންނާއި މިތުރު ޞަޙާބީން ޝާމިލުކުރަން.

(އެޑްރެސް ކުރުން)

އައްސަލާމް ޢަލައިކުމް ވަރަޙުމަތުﷲ ވަބަރަކާތު.

އާދެ! ޤައުމެއްގެ އެންމެ އަގުހުރި ރައުސުލްމާލަކީ އެޤައުމެއްގެ ކިޔަވާ ކުދިންކަން ޔަޤީން. ޤައުމެއް ތަރައްޤީ ކުރެވޭނީ ކިޔަވާ ކުދިންނަށް ރަނގަޅު ތަޢުލީމެއް ދެވިގެން. ވުމާއެކު ދިވެހިރާއްޖޭގައި 14 އަހަރަށްފަހު އައު ޤައުމީ މަންހަޖެއް ތަންފީޒު ކުރުމަށް މިއަދު އަޅުގަނޑުމެން މިދަތުރު ފަށަނީ މާތް ﷲ ސުބުޙާނަހޫ ވަތަޢާލާގެ ޙަޟުރަތުން ވާގިއެދޭޙާލު، މިޤައުމަށް ހެވާއި ލާބައާއި އިތުރު އަރުތަތަކަށް އެދިގެން.

މިއުފާވެރި މުނާސަބަތުގައި މި މުހިންމު މަސައްކަތް ކުރިއަށް ގެންދިއުމަށް ހިތްވަރު ދެއްވި އެންމެހާ ބޭފުޅުންނަށް އަޅުގަނޑު ޝުކުރު ދަންނަވަން. ޚާއްޞަގޮތެއްގައި ޤައުމީ މަންހަޖު ފަރުމާކޮށް، ނިންމަންޖެހޭ ނިންމުންތައް ނިންމުމުގައި މިނިސްޓަރ އޮފް އެޑިޔުކޭޝަން ޑޮކްޓަރ ޢާއިޝަތު ޝިހާމް ދެއްކެވި ހަރުދަނާ ލީޑަރޝިޕަށްޓަކައި އެކަމަނާއަށް ތަހުނިޔާ ދަންނަވަމުން ފަށްފަށުން ޝުކުރު ދަންނަވަން.

އާދެ، މަދަރުސީ ތަޢުލީމުގެ ޤައުމީ މަންހަޖާއި މުޤައްރަރުތައް ފަރުމާކޮށް، މީހުން ތަމްރީނު ކުރުމާހަމައަށް މިއާދެވުނީ އެން.އައި.އީގެ ވަރަށް ގިނަ މުވައްޒަފުންގެ، އަގު ނުކުރެވޭފަދަ ޚިދުމަތްތަކާއެކު. އެކަމަށްޓަކައި، އެހުރިހާ ބޭފުޅުންނަށް އަޅުގަނޑު ހިތުގެ ފުންމިނުން ޝުކުރު ދަންނަވަން.

އެނގިވަޑައިގަންނަވާނޭފަދައިން، ދިވެހިރާއްޖޭގެ މަދަރުސީ ތަޢުލީމުގެ ޤައުމީ މަންހަޖަކީ އުނގެނުމާއި އުނގަންނައިދިނުމާގުޅޭ އެންމެ މުހިންމު ތަޢުލީމީ ސިޔާސަތު. ޤައުމީ މަންހަޖުގައި ބަޔާންކޮށްފައިއެވަނީ ދިވެހިރާއްޖޭގެ މަދަރުސާތަކުގައި އުނގަންނައިދޭ ތަފާތު މަރުޙަލާތަކުގައި އުނގެނުމާއި އުނގަންނައިދިނުމުގެ އެންމެހައި ކަންކަން ތަރުތީބު ކުރެވިފައިވާގޮތް.

މަދަރުސީ ތަޢުލީމުގެ މަންހަޖަކީ މުރާޖަޢާ ކުރަންޖެހޭ އެއްޗެއް. ދިވެހިރާއްޖޭގެ ތަޢުލީމީ ޤައުމީ މަންހަޖު މުރާޖަޢާ ކުރުމުގެ މަސައްކަތް ކުރެވިފައިމިވަނީ ރާއްޖެއާއި ދުނިޔެއަށް އަންނަމުންދާ އިޖުތިމާޢީ، އިޤްތިޞާދީ، ސިޔާސީ، ބަދަލުތަކާއި އުނގަންނައިދިނުމުގެ ވަށްޓަފާޅިއަށް އަންނަމުންދާ ބަދަލުތަކަށް އަމާޒުކޮށް.

ޤައުމީ މަންހަޖު އެކުލަވާލުމުގައި ތަޢުލީމީގޮތުން ކުރިއަރާފައިވާ ޤައުމުތަކާއި ކުދި ޤައުމުތަކާއި އިސްލާމީ ޤައުމުތަކުގެ މަންހަޖު ރޭވިފައިވާގޮތް ދިރާސާކުރެވުނު. ފުޅާދާއިރާއެއްގައި ދިވެހިރައްޔިތުންގެ މަޝްވަރާއާއި ޚިޔާލު ހޯދުނު. މިދެންނެވި މަޝްވަރާތަކަށްފަހު އައު ޤައުމީ މަންހަޖެއް އެކުލަވައިލުމަށް ނިންމައި، ކަރިކިއުލަމް ސްޓިއަރިންގ ކޮމެޓީއެއް އުފެއްދި.

އައު ޤައުމީ މަންހަޖު އެކުލަވާލައިފައިވަނީ މައިގަނޑު 8 އަސާސެއްގެ މައްޗަށް. އެ އަސާސްތަކަކީ: އިސްލާމް ދީން، ދިވެހި ވަންތަކަމާއި ޘަޤާފަތް، އިންސާނީ ޙައްޤުތަކާއި ޑިމޮކްރަސީއާއި ޢަދުލު އިންޞާފު، ދަރިވަރުންގެ ޖުމުލަ ތަރައްޤީ، ދަރިވަރުންގެ ޤާބިލުކަންހުރި އެންމެ މަތީ ދަރަޖައަކަށް ދިއުމަށް މަގުފަހިކޮށްދިނުން، ހުރިހާ ކުދިން ޝާމިލުކުރުން، ދިރިއުޅުމަށް ތައްޔާރުކުރުން، އުނގެނޭ އެއްޗަކާ ދިރިއުޅުމާ ގުޅުވުން މިއެވެ.

އައު ޤައުމީ މަންހަޖުގެ ތަޞައްވުރަކީ ސްކޫލްތަކުން ކިޔަވާ ދަރިވަރުންނަކީ "އުނގެނުމަށް ޝައުޤުވެރިވާ، އިސްލާމް ދީނާއެއްގޮތަށް ޢަމަލުކުރާ، ޒިންމާދާރު އަދި އުފެއްދުންތެރި ފަރުދަކަށް ހެދުން".

އެފަދަ ދަރުދުންގެ ކިބައިގައި ހަރުލައްވަން ބޭނުންވާ ޤާބިލިއްޔަތުތަކެއް މިޤައުމީ މަންހަޖުގައި ކަނޑައަޅާފައިވޭ. އެޤާބިލިއްޔަތުތަކަކީ: އިސްލާމްދީނާ އެއްގޮތަށް ޢަމަލުކުރުން، ނަފުސު ދެނެގަތުމާއި ތަންޒީމުކުރުން، ބިނާކުރަނިވި އަދި އުފެއްދުންތެރިގޮތެއްގައި ވިސްނުން، އެހެން މީހުންނާ ގުޅިގެން އުޅުން، ދޭހަވުމާއި ދޭހަކޮށްދިނުން، ދުޅަހެޔޮ ދިރިއުޅުމެއް އުޅުން، ދެމެހެއްޓެނިވި ތަރައްޤީއަށް ޢަމަލުކުރުން، ޓެކްނޮލޮޖީއާއި މީޑިއާ ބޭނުންކުރުން

މިޤާބިލިއްޔަތުތަކަކީ ގުޅި، ލާމެހިފައިވާ ޤާބިލިއްޔަތުތަކެއް. މިޤާބިލިއްޔަތުތައް ހަރުދަނާގޮތެއްގައި ދަރިވަރުންނަށް ވާޞިލުކޮށްދެވޭނީ އުނގެނުމުގެ މާޙައުލުން ދަރިވަރުންނަށް ފުރުޞަތުތަކެއް ފަހިކޮށްދެވިގެން. ޢަމަލީގޮތުން ދަރިވަރުން ލައްވައި ކަންތައްތަކެއް ކުރުވައިގެން.

ޤައުމީ މަންހަޖުގައި އުނގެނުންވެސް ބަހައިލެވިފައިވަނީ މައިގަނޑު 8 ދާއިރާއަކަށް. އެ ދާއިރާތަކަކީ: އިސްލާމްދީނާއި ރޫޙާނިއްޔަތު، ބަހާއި މުއާޞަލާތު، ހިސާބު ޢިލްމު، ތިމާވެށްޓާއި ސައިންސާއި ޓެކްނޮލޮޖީ، ޞިއްޙަތާއި ދުޅަހެޔޮކަން، އިޖުތިމާޢީ ޢިލްމު، އުފެއްދުންތެރި ފަންނު، އޮންޓޮޕްރޮނިއަރޝިޕް

އާދެ! ޤައުމީ މަންހަޖު ތަންފީޒު ކުރުމުގައި ވިސްނަންވީ އެއްކަމަކީ އެކި ދަރިވަރުންގެ އުނގެނުމުގެ ގޮތްތައް ތަފާތު ވާނެކަން. ވުމާއެކު، އުނގަންނައިދޭންވާނީ ދަރިވަރުން ޢަމަލީގޮތުން ބައިވެރިކޮށްގެންނެވެ. އުނގަންނައިދިނުމާއި ތަރުބިއްޔަތު ކުރުމުގެ ތަފާތު އުޞޫލުތައް ބޭނުންކޮށްގެން.

އަދި، މަންހަޖު ތަންފީޒުކުރުމުގައި ދަރިވަރުންގެ ރޫޙާނީ، ޖިސްމާނީ، އިޖުތިމާޢީ، ދުޅަހެޔޮކަމަށް ހަމަހަމަގޮތެއްގައި ބާރު އަޅަންވާނެ. މިކަން ކުރެވޭނީ މިމަންހަޖަށް މަދަރުސާތަކުގެ ވެރިންނާއި މުދައްރިސުންނާއި ބެލެނިވެރިން އަހުލުވެރި ކުރުވައިގެން.

މިމަންހަޖުގައި މަދަރުސީ ތަޢުލީމުގެ ނިޒާމްވަނީ މަރުޙަލާތަކަކަށް ތަރުތީބު ކުރެވިފައި. އެ މަރުޙަލާތަކަކީ: ޅަފަތުގެ ތަޢުލީމާއި ތަރުބިއްޔަތުގެ މަރުޙަލާ- ޕްރީސްކޫލް، ފަށާ ތަޢުލީމުގެ މަރުޙަލާ- ކީސްޓޭޖް 1 އަދި 2، ދަށު ސާނަވީ ތަޢުލީމުގެ މަރުޙަލާ ކީ ސްޓޭޖް 3 އަދި 4، މަތީ ސާނަވީ ތަޢުލީމުގެ މަރުޙަލާ ކީ ސްޓޭޖް 5

މިމަންހަޖު ތަންފީޒު ކުރަންފެށުމުން ޕްރީސްކޫލްގައި ކިޔަވައިދެވޭނީ ދިވެހި ބަހުން. ކީ-ސްޓޭޖް 1 ން ކީ-ސްޓޭޖް 5 ށް ދިވެހި ބަހާއި އިސްލާމީ ތަރުބިއްޔަތާއި ޤުރުއާން ފިޔަވައި އެހެން މާއްދާތައް ކިޔަވައިދެވޭނީ އިނގިރޭސި ބަހުން. ޕްރީސްކޫލްގައި ބޭނުންކުރާނީ ޓީޗަރސް މެނުއަލްއެއް. ކީ-ސްޓޭޖް 1 ގައި ބޭނުންކުރާނީ ރިސޯސް ޕެކެއް. ކީ-ސްޓޭޖް 2 ން ކީ-ސްޓޭޖް 5 އަށް ބޭނުންކުރާނީ މަންހަޖާއެއްގޮތަށް ތައްޔާރުކުރެވޭ ޓެކްސްޓް ފޮތްތައް. ކޮންމެ ޕީރިއަޑެއްގެ 45 މިނިޓަށް އިތުރު ކުރެވިފައިވާނެ.

މި މަންހަޖު އެންމެ ފުރިހަމަގޮތުގައި ތަންފީޒުކޮށް، އެދެވޭ ނަތީޖާއެއް ހޯދޭނީ އެކަށީގެންވާ ތަމްރީނު ލިބިފައިވާ ފެންވަރު ރަނގަޅު ޓީޗަރުން ކިޔަވައިދީގެން. އަދި އުނގެނުމާއި އުނގަންނައިދިނުމުގައި އިންފޮމޭޝަން ކޮމިޔުނިކޭޝަން ޓެކްނޮލޮޖީ ބޭނުންކޮށްގެން. މުޖުތަމަޢުގެ އެންމެހާ ފަރުދުންގެ އެއްބާރުލުން ލިބިގެން. މީގެ އިތުރުން އިންސާނީ ވަޞީލަތްތައް ތަރައްޤީ ކުރުމަށާއި، ސުކޫލުތަކަށް ބޭނުންވާ އެހެނިހެން ވަޞީލަތްތައް ފޯރުކޮށްދެވިގެން.

އަޅުގަންޑުމެން އަމާޒުކޮށްފައި މިވަނީ އަންނަ އަފަރު ޕްރީ ސްކޫލާއި ގްރޭޑް 1 2 3 ގައި މަންހަޖު ތަންފީޒު ކުރުމަށް. ގްރޭޑް 4  5 6 ގައި މަންހަޖު ތަޢާރަފު ކުރާނީ 2016 ވަނަ އަހަރު. އަދި 2017 ވަނަ އަހަރު ހުރިހާ ގްރޭޑްތަކަށް މަންހަޖު ތަޢާރަފު ކުރެވޭނެ.

 

އާދެ! އަޅުގަނޑުގެ އިޚުލާޞްތެރި ދުޢާއަކީ އައު ޤައުމީ މަންހަޖުގެ ސަބަބުން ދިވެހި ކިޔަވާ ކުދިންނަކީ "އުނގެނުމަށް ޝައުޤުވެރިވާ، އިސްލާމް ދީނާއެއްގޮތަށް ޢަމަލުކުރާ، ޒިންމާދާރު އަދި އުފެއްދުންތެރި ފަރުދަކަށް ހެދުން".މިމަންހަޖުގެ ސަބަބުން ދިވެހި ޤައުމަށް ފާގަތި މުސްތަޤުބަލެއް މިންވަރު ކުރެއްވުން. މާތް ﷲ އަޅުގަނޑުމެން މިކުރާ މަސައްކަތުގައި ބަރަކާތް ލައްވާށި. އާމީން. ވައްސަލާމް ޢަލައިކުމް ވަރަޙުމަތުﷲ ވަބަރަކާތު.