ހުޅުދުއްފާރު ސްކޫލްގެ 2014 ވަނަ އަހަރުގެ އިނާމު ދިނުމުގެ ޖަލްސާގައި މިނިސްޓަރ އޮފް ސްޓޭޓް ފޮރ އެޑިޔުކޭޝަން އާދަމް ޝަރީފު ޢުމަރު ދެއްކި ވާހަކަ : ރ. ހުޅުދުއްފާރު ސްކޫލް، 30 އެޕްރީލް 2015
ޢިލްމުގެ ނޫރުން ހިތްތައް އަލިކުރެއްވި ކީރިތިވަންތަ ﷲ ސުބުޙާނަހޫ ވަތަޢާލާއަށް ޙަމްދާ ޝުކުރުކުރަން. ސީނުކަރައަށް ގޮސްގެންވެސް ޢިލްމު ހޯދުމަށް ޙަދީޘް ކުރެއްވި މިއުންމަތުގެ ލޮބުވެތި ސާހިބާ މުޙައްމަދު ޞައްލަﷲ ޢަލައިހިވަސައްލަމައަށް ޞަލަވާތާއި ސަލާމް ލެއްވުންއެދި ދުޢާ ކުރަން. މި ޞަލަވާތާއި ސަލާމުގައި އެމާތް ނަބިއްޔާގެ އިތުރު އާލުންނާއި މިތުރު ޞަޙާބީން ޝާމިލުކުރަން.
(އެޑްރެސްކުރުން)
އައްސަލާމް ޢަލައިކުމް ވަރަޙުމަތުﷲ ވަބަރަކާތު.
ހުޅުދުއްފާރު ސްކޫލްގެ 2014 ވަނަ އަހަރުގެ އިނާމު ދިނުމުގެ މިޚާއްޞަ ޖަލްސާގައި އަޅުގަނޑުގެ އެންމެ އިސް ވާޖިބެއްކަމުގައި ދެކެނީ މިރޭ، ވަރަށް ފަޚުރުވެރި ރަން ވަނަތައް ޙާޞިލުކުރި ޝަރަފުވެރި ދަރިވަރުންނަށް، އެ ދަރިވަރުން ހޯދި މަތިވެރި ކާމިޔާބީއަށްޓަކައި ތަހުތިޔާއާއި މުބާރިކްބާދު އަދާކުރުން.
އަދި، އެކުދިން ހޭހަންކޮށްދީ، ފޮތް ދަބަސް ތައްޔާރުކޮށްދީ، އަތުކުރީގައި ހިފައިގެން ދެއިރު ދެދަޅައަށް ސްކޫލްދޮށަށް ހިނގާ، ފަތިހު ފިލާވަޅު ދަސްކުރަން ކުދިން ތަންމަތިން ނަގައިގެން ކުދިން ކިޔެވުމަށް ކުރާ މަސައްކަތާ އެއްވަރުގެ ޤުރުބާނީއެއްވި، އޯގާތެރި، ހިތްވަރުގަދަ ބެލެނިވެރިންނަށް، އެ ބެލެނިވެރިންގެ ދެލޯނޭދިއެދޭ ދަރިފުޅަށް ހޯދައިދިން ރީތި ނަމަށްޓަކައި އައްސަރިބަހާއި ސާބަސް ރައްދުކުރުން.
ހަމަ މިނޭވާގައި، އެއްވެސް ވަރުބަލިފުޅުވުމެއްނެތި، ކިޔަވައިދެއްވައި، ނުހަނު ކެތްތެރިކަމާއި އަޅާލުމާއި ލޯތްބާއެކު، ނުސިޔާނު ވަގުތުތަކުގައިވެސް ކުދިންގެ އިޙުސާސްތައް ވަރަށް ރަނގަޅަށް ދެނެވަޑައިގެން، ކުދިންނަށް ރަނގަޅު ތަޢުލީމަކާއި އެދެވޭ ތަރުބިއްޔަތެއް ދެއްވުމަށްޓަކައި އަގުނުކުރެވޭފަދަ ޚިދުމަތްތަކެއްކޮށްދެއްވަމުންގެންދަވާ ހީވާގި މުދައްރިސުންނަށާއި ސްކޫލްގެ ވެރިންނަށް އަބަދާއަބަދު ޙައްޤުވާ ޝުކުރު މިރޭވެސް އަޅުގަނޑު ފަށްފަށްކުރަން.
އާދެ، ތިމާމެންނަށް ލިބޭ ތަޢުލީމާއި ތަރުބިއްޔަތުގެ އަގުވަޒަންކޮށް، ހިތްވަރު ލިބިގަތުމުގެ މިފަދަ މަޢުނަވީ މުނާސަބަތެއްގައި ސްކޫލްތަކުގައި މިއަދާހަމައަށް ތަޢުލީމު ދެމުން މިދިޔަގޮތާއި މިއަދު ތަޢުލީމު ދޭންޖެހިފައިވާގޮތާމެދު ކޮންމެވެސް މިންވަރަކަށް އަލިއަޅުވާލުމަކީ މުނާސަބު ކަމެއްކަމުގައި އަޅުގަނޑު ދެކެން.
އާދެ، މިއަދާހަމައަށްވެސް ބެލެނިވެރިންނާއި ސްކޫލްތަކުން މަސައްކަތްކުރަމުން ގޮސްފައިވަނީ ދަރިވަރުންނަށް އިމްތިޙާންތަކުން މަތީ ކާމިޔާބީއެއް ހޯދައިދިނުމަށް. ގަލަމު ތުނޑުން ކައިގެންބޮއެގެން އުޅެވޭނެގޮތެއް ހޯދައިދިނުމަށް. ނަތީޖާއެއްގެގޮތުން ދިވެހިންގެ ހުނަރުވެރިކަމާއި ފަންނުވެރިކަން މިއަދުވަނީ ގާދޫކޮލުން ނިކުމެގެން ރާއްޖެ ދޫކޮށް ބަންގާޅަށާއި އޮޅުދޫކަރައަށް ގޮސްފައި. އަދި ކީއްކުރަންތޯ! ތިމާގެ ޟަރޫރީ ބޭނުންތައް ފުއްދުމަށް ކޮންމެހެން ތިމާ ކުރަންޖެހޭ ކަންކަން ކުރުމަށްޓަކައިވެސް މިއަދު އަޅުގަނޑުމެން މިވަނީ ލިބޭ މަދު ފައިސާފޮތިވެސް ބޭރު މީހަކަށް މުސާރައަށް ދޭންޖެހިފައި.
އަނެއްކޮޅުން، ކިޔަވަމުންދާ ކުދިން ގިނަވީވީހެން މަގުމަތިވާ ނުވަތަ ޖަލަށްދާ ޒުވާނުންވެސް ދަނީ ގިނަވަމުން. ތަޅާފޮޅުމާއި މާރާމާރީ ދަނީ އެއްދުވަހުން އަނެއް ދުވަހަށް އިތުރުވަމުން. ސައްތައިން ސައްތަ މުސްލިމު ޤައުމެއްކަމަށް ދަޢުވާކުރާ މިކުޑަކުޑަ ދިވެހިރާއްޖޭގައި ޙައްޤަކަނުލާ މީހުން މެރުންފަދަ ބޮޑެތި ޖަރީމާތައްވެސް ދަނީ ގިނަވަމުން. މައިންބަފައިންނާއި މުސްކުޅިންނަށް މާތްކޮށް ހިތުމާއި ކަމޭ ހިތުމަށް މާތްވެގެންވާ އިސްލާމް ދީނުގައި ނުހަނު ބޮޑަށް ބާރުއަޅާފައިވާއިރުވެސް، ރާއްޖޭގެ ބަލާލި ކޮންމެ ދިމާއަކުން ފެންނަނީ ގިނަވެފައިވާ މުސްކުޅިން. މާޔޫސްވެފައިވާ މައިންބަފައިން.
ވުމާއެކު ދެވޭ ތަޢުލީމާއި ތަރުބިއްޔަތާއި ނިކުންނަ ނަތީޖާއާމެދު ފުންކޮށް ވިސްނައި، ހެޔޮ ބަދަލުތަކެއް ތައުލީމި ނިޒާމަށް ގެންނަންވެއްޖެކަމުގެ އިންޒާރު މިއަދު މުޖުތަމަޢުގެ ބަލާލި ކޮންމެ ދިމާއަކުން ލިބެމުން އެބަދޭ.
އެހެންވީމާ، މިއަދު ސްކޫލްތަކުންދޭ ތަޢުލީމު ވާންޖެހޭނީ އަޅުގަނޑު ދެންމެ މިދަންނަވާލި ކަންކަން ހެޔޮމަގަށް ބަދަލުކޮށްލާނެ ތަޢުލީމަކާއި ތަރުބިއްޔަތަކަށް. ސްކޫލްތަކުން ދެވޭ ތަޢުލީމާ އެއްވަރަށް ކުދިން ތަރުބިއްޔަތު ކުރުމަށް މިއަދު މިވަނީ ވަރަށް ވަރުގަދަ ޖިހާދެއް ކުރަންޖެހިފައި. ކުދިންގެ ކިބައިގާ ތަރުބަވީ ރަނގަޅު ސިފަތަކެއް، ހަރުދަނާ އަޚުލާޤެއް އަށަގެންނެވުމަށްޓަކައި ވަރަށް ޙިކުމަތްތެރިކަމާއެކު ގިނަގުނަ މަސައްކަތްތަކެއް ކުރަންޖެހިފައި. ތަޢުލީމުގެ މާނައާމެދު މިހާރަށްވުރެ ބޮޑަށް ފިކުރު ކުރަންޖެހިފައި. ދަރިވަރުންނަށް ދެވޭ ތަޢުލީމާއި ތަރުބިއްޔަތުގެ ސަބަބުން ވަށާޖެހިފައިވާ ތަޢުލީމެއް ކުދިންނަށް ލިބި، ރޫޙާނީ ތަރައްޤީއަށް ސަމާލުކަންދޭ، އުފާވެރި ވެށްޓެއްގައި، މިނިވަންކަމާއި ޞުލްޙަ މަސަލަސްކަންމަތީ، ފާގަތި ދިރިއުޅުމެއް އުޅެވޭނެ ހަރުދަނާ ޒުވާނުންތަކެއް ރާއްޖޭގައި އުފައްދަން ޖެހިފައި. މާތްވެގެންވާ އިސްލާމް ދީނުގެ ހިޔަލުގައި، ފުރިހަމަ ދިވެހި މުވާޠިނުންތަކެއްގެގޮތުގައި އުޅެމުންދާ ޤައުމެއް ބިނާކުރަންޖެހިފައި.
އާދެ، މިދެންނެވިފަދަ މަޢުނަވީ ތަޢުލީމަކާއި ތަރުބިއްޔަތެއް ކުދިންނަށް ދެވޭނީ މިހާރަށްވުރެ ބޮޑަށް ބެލެނިވެރިންނާ މުދައްރިސުންނާއި ސްކޫލްތަކުގެ ވެރިން ގުޅިގެން މަސައްކަތް ކޮށްގެން. ކުދިންގެ ތަޢުލީމާއި ތަރުބިއްޔަތަށްޓަކައި ވަރަށް ސާފުސާދާ، ދެފުށް ފެންނަ ގުޅުމެއް އެފަރާތްތަކާއި އަދި ކުދިންނާ ދެމެދު އުފެދި، ޙާޞިލު ކުރަން ބޭނުންވާ ލަނޑުދަނޑިތައް އެކުގައި ޙިއްޞާކޮށް، އެލަނޑުދަނޑިތައް ޙާޞިލުކުރުމަށް ސްކޫލްގެ މުވައްޒަފުންނާއި ބެލެނިވެރިންނާއި ދަރިވަރުންނާއި އަދި ރަށުގެ ކަމުވޮށިގެންވާ ފަރާތްތައް ވަރަށް ބޮޑަށް ގުޅިގެން މަސައްކަތްކޮށްގެން. ރަށުވާދައާއި އަވަށު ވާދައާއި ޕާޓީ ވާދައާއި ފިތުނައާއި ޙަސަދަވެރިކަމުން އަޅުގަނޑުމެން ދިރިއުޅެމުންދާ ވެށި ސލާމަތްކޮށްގެން. ކުދިންނަށް ރަނގަޅު ނަމޫނާތަކެއް އަޅުގަނޑުމެން ބޮޑެތި މީހުން ދަށްކައިގެން. ވުމާއެކު، މުސްތަޤުބަލުގެ އުންމީދު ކަމުގައިވާ މިއަދުގެ ކިޔަވާ ކުދިންނަށް ވަށާޖެހިފައިވާ ތަޢުލީމެއްދީ، ހަރުދަނާ މުޖުތަމަޢެއް ބިނާކުރުމަށްޓަކައި ތިޔަ އެންމެހާ އަޚުންނާއި އުޚުތުން، އަތާއަތް ގުޅާލައިގެން، ވަރަށް ވަރުގަދަ އިޖުތިމާޢީ ރޫޙެއްގައި މަސައްކަތްކޮށްދެއްވުމަށް އަޅުގަނޑު ވަރަށް އިޚުލާޞްތެރިކަމާއެކު މިރޭ އިލްތިމާސް ކުރަން.
މިއުފާވެރި ރަސްމިއްޔާތު ޝަރަފުވެރިކޮށްދިނުމަށް އަޅުގަނޑަށް ދައުވަތު ދެއްވިކަމަށްޓަކައި ސްކޫލްގެ ވެރިންނަށާއި ސްކޫލް ބޯޑާއި ޕީ.ޓީ.އޭ ގެ އެންމެހާ މެންބަރުންނަށް ނުހަނު އިޚުލާޞްތެރިކަމާއެކު ޝުކުރު ދަންނަވަން.
އަޅުގަނޑުގެ ދުޢާއަކީ ރަނގަޅު ތަޢުލީމަކާއި އެދެވޭ ތަރުބިއްޔަތެއް ދިނުމަށް އަޅުގަނޑުމެން އެންމެން މިކުރާ މަސައްކަތުގައި މާތްﷲ ބަރަކާތް ލައްވައި އަޅުގަނޑުމެން ކުރަމުންމިދާ މަސައްކަތަށް ތައުފީޤު ދެއްވުން. އާމީން. ވައްސަލާމް ޢަލައިކުމް ވަރަޙުމަތުﷲ ވަބަރަކާތު.
30 އެޕްރީލް 2015