މައިސޫރުގައި ކިޔަވަމުންދާ ދިވެހި ދަރިވަރުންގެ ދަސްވެނިވުމުގެ ރަސްމިއްޔާތުގައި ދެއްކި ވާހަކަ
ޢިލްމު އުނގެނުން ފަރުޟު ކުރެއްވި ﷲ ސުބުޙާނަހޫ ވަތަޢާލާއަށް ޙަމްދާ ޝުކުރު ކުރަން. ދެދުނިޔޭގެ ބާއްޖަވެރިކަން ލިބެނިވި ރިސާލަތައިގެން މިއުންމަތަށް ކައުކުރެއްވި ސާހިބާ މުޙައްމަދު ޞައްލަﷲ ޢަލައިހި ވަސައްލަމައަށް ޞަލަވާތާއި ސަލާމް ލެއްވުންއެދި ދުޢާ ކުރަން.
(އެޑްރެސް ކުރުން)
އައްސަލާމު ޢަލައިކުމް ވަރަޙުމަތުﷲ ވަބަރަކާތު
މިއަދަކީ ތަފާތު ސަބަބުތަކަކަށްޓަކާ ނުހަނު އުފާވެރިދުވަހެއް. މި މައިސޫރުގެ ހިތްގައިމު މާހައުލުގައި ތަޢުލީމު ޙާސިލުކުރަމުންދާ ދިވެހި އެންމެހާ ދަރިވަރުންނާއި އެ ދަރިވަރުންގެ ބެލެނިވެރިންނާ ބައްދަލުވެލުމުގެ އުފާ އަޅުގަނޑަށް ލިބުނުއިރު، މިއަދުގެ އުފާވެރިކަން އެންމެ ބޮޑަށް ގުޅިލާމެހިފައިވަނީ އެ ބަޔަކަށްޓަކާ މި ރަސްމިއްޔާތު ޚާއްސަކުރެވިފައިވާ ދަސްވެނީންނާ. އެއީ، ލޯބިވާ ދިވެހިރާއްޖޭގެ އިމުން ބޭރުގައި، އުނގެނުމުގެ ބުރަ މަސައްކަތާއި ހިތްވަރާއެކު ދިގު ތިން ހަތަރު އަހަރު ހޭދަކުރުމަށްފަހު ދަސްވެނިވާ ދަރިވަރުން. އާދެ! ތިޔަ ލޮބުވެތި ދަރިވަރުން.
ތިޔަ ދަރިވަރުންގެ ކާމިޔާބީގެ މި އިހުތިފާލުގައި ބައިވެރިވުމަށް އަޅުގަނޑަށް ދަޢުވަތުދެއްވާ، ތިޔަ ދެއްވި ފުރުޞަތަށްޓަކާ އިންތިހާއަށް ޝުކުރުވެރިވަން. އާދެ! މި ރީތި މައިސޫރަށް އައިސް، މިތަނުގައި ދިރިއުޅޭ އެންމެހާ ދިވެހިންނާ ބައްދަލުވެ، އަދި ތިޔަ ދަރިވަރުންގެ މިންނެތް މަސައްކަތުގެ އަގުވަޒަންކުރުމުގެ މި ހަފުލާގައި ބައިވެރިވުމުގެ ފުރުސަތު ދެއްވީތީ ތިޔަ އެންމެހާ ދަރިވަރުންނާއި ބެލެނިވެރިންނަށް، ވަކިން ޚާއްސަކޮށް ދަރިވަރުންގެ ޖަމިއްޔާގެ ރައީސް އަށާއި ހިންގާކޮމިޓީއަށް ޝުކުރުވެރިވަން.
ތަޢުލީމު ޙާސިލުކުރުމަށްޓަކާ ޤައުމުން ބޭރުގައި ދިގު މުއްދަތަކަށް ދިރިއުޅެމުން ދިއުމަކީ ކުޑަ ޤުރުބާނީއެއް ނޫން. އެކަން އެންމެ ރަނގަޅަށް އެނގޭނެ އެއްބަޔަކީ ތިޔަ ދަރިވަރުން. އެ ކަމުގެ ތެރޭގައި ތަފާތު ދަތި އުނދަގޫ ތަހައްމަލުކުރުމާއި އެތަކެއް ފިލާވަޅުތަކެއް ދަސްކުރުންވެސް ހިމެނޭ. އެހެނަސް، މި ކަމުގައި އަޅުގަނޑު ފާހަގަކޮށްލަން ބޭނުންވާ ދެތިން ނުކުތާއެއްވެސް އެބަވޭ.
މި މައިސޫރަކީ ތާރީޚީ ރަށެއް. މިއީ މިދާކަށް ދުވަހާ ޖެހެންދެންވެސް، ދެކުނު އިންޑިޔާގައި އެންމެ ނުފޫޒުގަދަ އެއް ރަށް. އިންޑިޔާގެ ހައެއްކަ ހާސް އަހަރުގެ ދިގު މާޒީގައި، ތަހުޒީބާއި ތަމައްދުންގެ ރޮނގުން ޚިދުމަތް ކުރެއްވި މުސްލިމް ރަސްރަސްކަލުން ކަމުގައިވާ ހައިދަރު އަލީ އާއި ޓިއްޕޫ ސުލްތާނުފަދަ ބޭބޭފުޅުންވެސް ފާހަގަކޮށްލެވޭފަދަ ޤުރުބާނީތައް ވެގެން ބިނާކުރެވިފައިވާ ހިތްފަސޭހަ ރަށެއް.
ތަޢުލީމީ ދާއިރާއަށް ނަޒަރު ހިންގާލާއިރު، މުޅި އިންޑިޔާއިންވެސް ފަސްވަނައަށް އެންމެ ފުރަތަމަ ޔުނިވާރސިޓީއެއް ޤާއިމުކުރެވުނީ މި އާޘާރީ ރަށުގައި. އަދި މުޅި އިންޑިއާއަކީވެސް، ވަރަށް މުއްސަނދި ސަޤާފަތެއް ތަޖުރިބާ ކުރަމުންދާ، އެތައް ދީނަކަށް މީހުން ދިރިއުޅޭ، އެތައް ބަހަކުން ވާހަކަ ދައްކާ ޤައުމެއް.
އަވައްޓެރި އިންޑިއާއާއި ދިވެހިރާއްޖެ ވަނީ ގުޅިފައި. ވިޔަފާރިއާއި ބޭސްވެރިކަމާއި މަތީ ތަޢުލީމުގެ ފުރުޞަތުތަކަށް މަގު ފަހިކޮށްދިނުމުގައި ދެ ޤައުމު މިވަނީ ވަކި ނުވެވޭވަރަށް ގުޅިފައި. ސިޔާސީގޮތުން ދެ ޤައުމުގެ ގުޅުން އަބަދުވެސް ރަނގަޅު. މިއީ ދެ ޤައުމުގެ ރައްޔިތުންނަށްވެސް ވަރަށް ބޮޑު ނަޞީބެއް. އެހެންކަމުން، އަޅުގަނޑު ޤަބޫލުކުރާހިތް އޮތީ، ތިޔަ ދަރިވަރުންނަކީ، އެކިއެކި ދީންތަކާއި ޘަޤާފަތުތަކުން މުއްސަންދިކަން ހޯދާފައިވާ އިންޑިޔާގެ ޒަމާނީ ތަޢުލީމުގެ އާރުތަކުން ޢިލްމު ހޯދަމުންދާ ދަރިވަރުންތަކެއް ކަމަށް.
ލޮބުވެތި ދަސްވެނިން! މަތީ ތަޢުލީމުގެ އެކި މަރުހަލާތަކުން މިއަދު ތިޔަ ކުދިން ދަސްވެނިވުމަކީ ތިޔަ ކުދިންގެ ލޭފަވަތި ބެލެނިވެރިން ވަރަށް އުފާވާނެ ކަމެއް. ތިޔަ ދަސްވެނިން ތިޔަ ހޯއްދެވި މަތިވެރި ކާމިޔާބީއަށް އަޅުގަނޑު ތަހުނިޔާ ދަންނަވަން. ތިޔަ ދަސްވެނިންގެ ސަބަބުން ދިވެހި ޤައުމަށް ރީތި ނަމާއި ކުރިއެރުން ލިބިގެންދާނެކަން ޔަޤީން.
މިއަދު ދިވެހިރާއްޖެއަށް އެންމެ ބޭނުންވާ މުހިންމު ސިފަތަކެއްކަމަށް މި ފެންނަނީ، ކެތްތެރިކަމާއި، އޯގާވެރިކަމާއި އަޅާލުމާއި އެމުނިއެކުލެވިގެން ދިރިއުޅުމުގެ ހުނަރާއި ސިފަތައް. މިކަންކަން، ތިޔަ ދަސްވެނިންނަށް ފޮތެއްގައި ލިޔެގެން އަންގައިނުދިނަސްވެސް، މި މައިސޫރުގެ މުއްސަނދި ޘަޤާފަތުގެތެރެއިން، ދިރިއުޅުމުގެ ރިވެތި އާދަތަކުން ތިޔަ ދަރިވަރުންނަށް ދަނީ އެކަމުގެ ފިލާވަޅުތައް ކޮންމެ ދުވަހަކުވެސް ލިބެމުން. އެހެންވީމާ، އަޅުގަނޑަށް ޔަޤީން، ތިޔައިގެ ތެރެއިން ހަމަ ކޮންމެ ދަރިވަރަކީވެސް، އެނބުރި ރާއްޖެ ދިއުމަށްފަހު، މިއަދު ރާއްޖޭގެ މާހައުލުން ފެންނަމުންދާ އިޖުތިމާއީ ބައެއް ބަލިތަކަށް ފަރުވާ ހޯދައިދޭނެ ދަރިވަރުންތަކަކަށް ވާނެކަން.
މިކަންކަމަށް ފަހި ކުރުމަށްޓަކާ، އާދެ! އެމުނިއެކުލެވިގެން އުޅެންދަންނަ ދިވެހި ރައްޔިތެއް އުފެއްދުމަށްޓަކާ، އަދުގެ ސަރުކާރުން ދަނީ ވަރަށް ބުރަކޮށް މަސައްކަތް ކުރައްވަމުން. އެނގިލައްވާނެ، ރާއްޖެއިން ބޭރުގައި ދިރިއުޅެމުންދާ ދިވެހިންނަށް އަމާޒުކޮށް ސަރުކާރުންދަނީ ތަފާތު ޚިދުމަތްތައް ތަޢާރަފުކުރަމުން. ކަންކަމުގައި އަތްބާރު އަޅައިދީ އެހީތެރިވަމުން. ވަކިން ޚާއްސަކޮށް، ޘާނަވީ ތަޢުލީމަށް ސަރުކާރުން ދޫކުރައްވަން ފެއްޓެވި ލުއި ލޯނުގެ ސަބަބުން އެތަކެއް ދަރިވަރުންނަކަށް ވަނީ އެ ދަރިވަރުންގެ ކިޔެވުން ކުރިޔަށް ގެންދިއުމަށް މަގުފަހިވެފައި. އެ ދަރިވަރުންގެ އުންމީދު މިވަނީ އާވެފައި. ހަލުއި އިޤުތިޞާދީ ދުވެއްޔާއެކު، ކިޔަވައި ނިމޭ ދަރިވަރުން ވަންނާނެ ވަޒީފާތައް ދަނީ ބާރު މިނުގައި އުފެދެމުން. ތިޔަ ދަރިވަރުންގެ ތެރެއިން ހަމަ އެއްވެސް ޒުވާނަކީ ބާކީނުވާނެ ޒުވާނެއްކަން މިދަނީ ކަށަވަރުކުރެވެމުން. މާތް ﷲ ގެ އިރާދަފުޅުން، ތިޔަ ދަރިވަރުންގެ މުސްތަޤުބަލު ފެންނަނީ އުޖާލާކޮށް.
ޒުވާނުން ކުރިއަރުވައި، މަތީ ތައުލީމުގެ ފުރުޞަތުތައް ޢާންމު ކުރުމަކީ ރައީސް ޔާމީންގެ ސަރުކާރުގެ ވަރަށް މުހިންމު ވަޢުދެއް. އެ ވަޢުދުގެ ދަށުން މިހާރުވެސް މަތީ ތަޢުލީމުގެ 375 ފުރުޞަތު ފުޅުވާލާފައިވޭ. މިހާރު ކިޔަވަމުންދާ ދަރިވަރުންނަށްވެސް އެ ފުރުޞަތުތަކަށް ކުރިމަތި ލެވޭނެ. އަދި މިއަހަރުގެ ތެރޭގައި އިތުރު 700 މަތީ ތައުލިމުގެ ފުރުޞަތު ހުޅުވާލެވޭނެ. އަދި މަތީ ތަޢުލީމު އުނގެނެން ބޭނުންވާ ނުވަތަ އުނެގނެމުންދާ ފަރާތްތަކުގެ ތެރެއިން ތަނަވަސްކަން ނެތް ފަރާތްތަކަށް ޒަކާތު ފަންޑުންވެސް މިހާރު މިވަނީ 10 މިލިއަން ޚަރަދު ކުރަން ހަމަޖައްސާފައި.
ޝައްކެތް ނެތް ގޮތުގައި މި ހުރިހާ ފުރުޞަތުތަކެއް ސަރުކާރުން ހޯދައިދިނުމުގެ ބޭނުމަކީ އަޅުގަނޑުމެންގެ ލޮބުވެތި ޤައުމު ތަރައްޤީ ކުރުމަށް މަގު ފަހި ކުރުން. ތައުލީމީ ޒުވާނުން އުފެއްދުން. ހަރުދަނާ އިޤުތިޞާދެއް ބިނާ ކުރުމުގައި އެންމެންގެ ބައިވެރިވުން އިތުރު ކުރުން.
އެހެންކަމުން، މަތީ ތައުލީމުގެ ފުރުޞަތުތައް އިތުރުކޮށްދެއްވަމުން ގެންދަވާކަމަށްޓަކައި ރާއްޖޭގެ ލޮބުވެތި ރައީސުލްޖުމްހޫރިއްޔާ އަބުދުﷲ ޔާމީން ޢަބުދުލްޤައްޔޫމަށް އަޅުގަނޑު ޝުކުރު ދަންނަވަން.
އަޅުގަނޑުގެ ދުއާއަކީ، ތިޔަ އެންމެހާ ދަރިވަރުންނަކީވެސް ޤައުމަށް ވަފާތެރި ޚިދުމަތްރި ދަރިވަރުންކަމުގައި ވެގެން ދިއުން. އަޅުގަނޑުމެން މިކުރާ މަސައްކަތުގައި މާތް ﷲ ބަރަކާތް ލައްވާށި! އާމީން. ވައްސަލާމް ޢަލައިކުމް ވަރަޙުމަތުﷲ ވަބަރަކާތު.
ތާރީޚް ސާފުނުވޭ